Tags-Dhoka

har shaḳhs ko fareb-e-nazar ne kiyā shikār
har shaḳhs gum hai gumbad-e-jāñ ke hisār meñ

sar-e-manzil aa ke patā chalā ki qadam qadam pe fareb thā
kahīñ ham-safar kī umiid meñ kahīñ ham-safar kī talāsh meñ

kyā dil-fareb hai tire ḳhvāb-e-girāñ kā husn
tujh se nihāñ tire lab-o-ruḳhsār dekhnā

ab āh-o-zārī-e-ġham-ḳhvār kā fareb khulā
ye mehrbāñ bhī vahīñ dil lagā ke baiThe haiñ

yaar merā bahut hai yār-fareb
makr hai ahd sab qarār-fareb

iltifāt-e-zamāna par mat jā
'mīr' detā hai rozgār-fareb

ohde se nikleñ kis tarah āshiq
ek adā us kī hai hazār-fareb

raah rakhte haiñ us ke daam se said
hai balā koī vo shikār-fareb

chāleñ tamām be-Dhab bāteñ fareb haiñ sab
hāsil ki ai shukr lab ab vo nahīñ rahā tū

sab ko gumān bhī ki maiñ āgāh-e-rāz thā
kis darja kāmyāb fareb-e-majāz thā

uTThe haiñ ab nigāh se parde fareb ke
juz dard-o-ġham ḳhushī kā jahāñ meñ nishāñ kahāñ

fareb de ke tumheñ kyā sukūn miltā hai
hameñ to lutf milā hai fareb khāne meñ

dil ne fareb ishq meñ khaa.e kahāñ kahāñ
darmāndagī meñ ashk bahā.e kahāñ kahāñ

fareb detī haiñ vīrāniyāñ sadā to lagā
makān hai to yaqīnan koī makīñ hogā

dañg huuñ fareb-kārī ke ambār dekh kar
chehre pe aur chehroñ kī bhar-mār dekh kar

ham ne jo sāda-lauhī meñ khāyā koī fareb
phir vo fareb auroñ ko khāne nahīñ diyā

vo moḌ mere safar kā hai nuqta-e-āġhāz
fareb-ḳhurda-e-manzil hue jahāñ rah-rau

aql ne dil ko kar diyā hushiyār
bach ga.e ham fareb khāne se

fareb rah ke bhī mahrūmiyāñ muqaddar thiiñ
nazar uThā.ūñ to us ko kahīñ burā na lage

jo merī zāhirī sūrat se khā rahā hai fareb
yaqīn jāniye dard-e-nihāñ na samjhegā