Tags-Dhoka

ye tilism-e-husn-e-ḳhayāl hai ki fareb tere dayār ke
sar-e-bām jaise abhī abhī koī chhup gayā hai pukār ke

fareb-e-sub.h-e-bahārāñ bhī hai qubūl hameñ
koī naqīb to aayā payām-e-fardā kā

shiddat-e-shauq kā allāh re fusūñ uf re fareb
un kī nafrat pe mohabbat kā gumāñ hotā hai

har ek mauj meñ sāz-e-fareb hai jis kī
vo ik sarāb ba-har-e'tibār raah meñ hai

kahānī hai to itnī hai fareb-e-ḳhvāb-e-hastī kī
ki āñkheñ band huuñ aur aadmī afsāna ho jaa.e

fareb khā ke bhī va.adoñ pe e.atibār ai 'nūr'
ajab shu.ūr-e-vafā terā mere dilbar hai

tama.a pindār jaur hirs fareb
gāmzan kārvān-e-zar dekhā

ik baar agar qafas kī havā raas aa ga.ī
ai ḳhud-fareb phir havas-e-bāl-o-par kahāñ

ishrat kī vādiyoñ se guzartā chalā gayā
paiham fareb-e-umr-e-gurezāñ liye hue

do gaz zamīñ fareb-e-vatan ke liye milī
vaise to āsmāñ bhī bahut haiñ zamīñ bahut

aayā na ek baar ayādat ko tū masīh
sau baar maiñ fareb se bīmār ho chukā

jo āñkheñ dekh letī haiñ ḳhizāñ kā daur phir un se
bahāroñ kā fareb-e-rañg-o-bū khāyā nahīñ jaatā

mohabbat kā fasāna ham se dohrāyā nahīñ jaatā
bas ab ham se fareb-e-ārzū khāyā nahīñ jaatā

hameñ shu.ūr ne dhoke diye haiñ rah rah kar
fareb khaa.e haiñ dānista beshtar ham ne

kare jo va.ada to is tarah kā ki dil ko sunte hī ho tasallī
jo sochiye phir to kaisā va.ada faqat bahāna fareb aur chhal

yahī log haiñ azal se jo fareb de rahe haiñ
kabhī Daal kar naqābeñ kabhī oḌh kar labāda

fareb-ḳhurda hai itnā ki mere dil ko abhī
tum aa chuke ho magar intizār baaqī hai

ġhunchoñ kā fareb-e-husn tauba kāñToñ se nibāh chāhtā huuñ
dhoke diye haiñ dostoñ ne dushman kī panāh chāhtā huuñ

ik to ye zindagī hī sarāsar fareb hai
aur us pe āgahī bhī barābar fareb hai

hai vāqi.a kuchh aur hī 'kāshif' pas-e-hijāb
jo aañkh dekhtī hai vo manzar fareb hai