Tags-Dhoka

fareb-e-dām meñ laa.ī hai kuchh sayyād kī ḳhātir
qafas meñ khīñch kar laayā hameñ kuchh āb-o-dāna bhī

fareb-e-chashm hai yaaro ki ik haqīqat hai
samāñ jo shahr kā hai shahr ke samāñ kī tarah

vahī manziloñ se bhaTak ga.e na junūñ ke saath jo chal sake
jo fareb hosh meñ aa ga.e rah-e-āgahī ko taras ga.e

saada diloñ ne rāhnumāyān-e-qaum se
itne fareb khaa.e ki chālāk ho ga.e

ḳhirad fareb-e-nazāroñ kī koī baat karo
junūñ-navāz bahāroñ kī koī baat karo

ho na jaa.e phir shu.ūr-e-kārvāñ nazr-e-fareb
chheḌ dī hai rāhbar ne aaj phir manzil kī baat

grīshm kī dil-fareb rātrī
kyā hoḌ lagā kar khile haiñ amaltās aur madhu-māltī

girā na aañkh se aañsū fareb-e-qismat par
sukūn jis se ho vo iztirāb paidā kar

dost kah kar na de fareb ai dost
dost par e'tibār hotā hai

qātil dikhā.ī de na masīhā dikhā.ī de
har shaḳhs ik fareb-e-tamāshā dikhā.ī de

ye dayār-e-shīsha-farosh hai yahāñ ā.īnoñ kī bisāt kyā
yahāñ is tarah se rakho qadam ki fareb meñ bhī yaqīn ho

jahāñ zikr-e-mehr-o-vafā mile vahīñ 'indirā' kā qalam chale
ye kitāb-e-ishq meñ ho raqam ki fareb meñ bhī yaqīn ho

yuuñ vafā ke saare nibhāo ġham ki fareb meñ bhī yaqīn ho
koī baat aisī kaho sanam ki fareb meñ bhī yaqīn ho

mire intizār ko kyā ḳhabar tumheñ iḳhtiyār hai is qadar
mujhe do salīqa ye kam se kam ki fareb meñ bhī yaqīn ho

mire ishq kā ye meyār ho ki visāl bhī na shumār ho
isī e'tibār pe ho karam ki fareb meñ bhī yaqīn ho

yahī baat kah do pukār ke vahī silsile raheñ pyaar ke
isī naaz meñ rahe phir bharam ki fareb meñ bhī yaqīn ho

mirī chāhatoñ meñ ġhurūr ho dil-e-nā-tavāñ meñ surūr ho
tumheñ ab ke khānā hai vo qasam ki fareb meñ bhī yaqīn ho

na chheḌo baat ulfat kī mohabbat aur chāhat kī
fareb-e-husn meñ ham ne sitam kyā kyā nahīñ dekhā

har samt pā rahā huuñ vahī rañg-e-dil-fareb
hāthoñ meñ kufr ke mirā īmāñ hai kyā karūñ

hamīd jis ne miTāyā hai baar baar mujhe
usī fareb-e-mohabbat meñ mubtalā huuñ maiñ