Tags-Dhoka

ik to ye zindagī hī sarāsar fareb hai
aur us pe āgahī bhī barābar fareb hai

hai vāqi.a kuchh aur hī 'kāshif' pas-e-hijāb
jo aañkh dekhtī hai vo manzar fareb hai

ik aur āsmāñ bhī hai is āsmān par
goyā yahāñ fareb ke uupar fareb hai

zālim fareb de ke na le dil ġharīb kā
ik roz kaam aa.egā terā diyā liyā

ḳhair ho yārab mire azm-o-yaqīñ kī ḳhair ho
laakh ehsās-e-fareb-e-dūrī-e-manzil sahī

khātā hai aadmī nazar ke fareb
dīda-e-dil jo vā nahīñ hotā

fareb de ga.ī aalam ko ḳhū-e-tanhā.ī
mire junūñ kī tabī.at to ḳhud-pasand na thī

bhaTak ke raah se ham sab ko aazmā aa.e
fareb de ga.e jitne bhī rahnumā aa.e

'ājiz' tamām umr maiñ khātā rahā fareb
mujh ko mirī vafāoñ kā aisā sila na de

abhī lā kī manzil-e-saḳht meñ huuñ fareb-o-vahm-o-gumāñ liye
mire dil meñ phir bhī basā huā tirā naam radd-e-balā sā hai

duniyā maqām-e-hū nazar aa.egī nā-gahāñ
TūTegā jab tilism fareb-e-nigāh kā

chaltā nahīñ fareb kisī uzr-ḳhvāh kā
dil hai baġhal meñ yā koī daftar gunāh kā

na jaane rut kā tasarruf thā yā nazar kā fareb
kalī vahī thī magar rañg jhilmilā.e bahut

hai zindagī asīr-e-adam jāntā huuñ maiñ
duniyā tire fareb meñ aane se maiñ rahā

umīdoñ kī duniyā na ho jaa.e vīrāñ
fareb-e-tajassus na de duur ho kar

mujhe rah meñ mile the vo bāñdhe kamar chale jaate the baaġh ko vaqt-e-sahar
unheñ laatā pakaḌ mujhe kis kā thā Dar pa fareb ke qaul-o-qasam se chhuTe

a sham.a intihā-e-fareb-e-ḳhyāl dekh
masjūd sākinān-e-falak kā ma.aal dekh

is zamāne meñ jab apnoñ kā bharosa ho fareb
sochtī rahtī ho maiñ jā.ūñ kahāñ achchhī to ho

vo ḳhud-parast hai aur ḳhud-shanās maiñ bhī nahīñ
fareb-ḳhurda-e-vahm-o-qayās maiñ bhī nahīñ