Tags-Dhoop

niilī chamaktī dhuup to biktī nahīñ kahīñ
ham kis ke haath bech deñ lafz-o-bayāñ janāb

dekho is ke baad aa.egī aur añdherī kaalī raat
dhuup ke in TukḌoñ ko chun leñ jam.a yahī zarrāt kareñ

chehre kā āftāb dikhā.ī na de to phir
niilī chhalaktī dhuup se ā.ankhoñ ko bhar leñ ham

jo bhaTaktā thā kabhī dhuup ke sahrāoñ meñ
ab vo saaya mirī chaukhaT se nikaltā hī nahīñ

varna siyāh raat meñ jhulsā huā thā maiñ
ye to tumhārī dhuup meñ kuchh kuchh nikhar gayā

maiñ ne tamām chhāñv ġharīboñ meñ baañT dī
aur ye kyā ki dhuup ko pāgal banā diyā

saaya na ho to dhuup jalātī hai jism ko
tum kyā karoge dhartī se ākās chhīn kar

vaqt kī dhuup meñ tumhāre liye
shajar-e-sāya-dār the ham to

tum kamroñ meñ band rahe
dhuup nahīñ thī harjā.ī

kis haal jī rahā huuñ maiñ chāho jo jānñā
to dhuup meñ khaḌe hue paude ko ghūrnā

dhuup luTā kar ambar jab kañgāl huā
chāñd ugā kar phir se mālā-māl huā

dhuup aTak kar baiThā ga.ī hai chhajje par
osāre kā uThnā aaj muhāl huā

sukūn miltā hai jaltī huī dopahroñ meñ
banī haiñ marham-e-dil dhuup kī shuā.eñ bhī

khilī hai dhuup ka.ī din ke ba.ad āñgan meñ
phir alganī pe dupaTTe laTak rahe hoñge

havāle dhuup ke jis ne mujhe kiyā ik din
usī ke vāste saaya uThā ke laayā huuñ

jis dhuup kī dil meñ ThanDak thī vo dhuup usī ke saath ga.ī
in jaltī baltī galiyoñ meñ ab ḳhaak uḌā.ūñ kis ke liye

dhuup meñ jalte rahe haiñ sarv kī sūrat magar
ye ġhazab hai chāñd par phir bhī nazar karne lage

mom ke log kaḌī dhuup meñ aa baiThe haiñ
aao ab un ke pighalne kā tamāshā dekheñ

kaun vāris hai chhāñv kā āḳhir
dhuup meñ ham-safar se pūchhte haiñ

vaqt kī dhuup tez hotī hai
ham-safar ho to raah kaT jaa.e