Tags-Dhoop

ye shaam vaqt se pahle chhupā na de sūraj
sunahrī dhuup meñ chunarī bhigo rahī huuñ maiñ

vahī ashk-e-ḳhūñ ke gulāb haiñ vahī ḳhaar ḳhaar hai pairahan
na karam kī aas bujhī abhī na sitam kī dhuup ziyāda hai

jo ham-azāb thā us kī hī chhāñv meñ aa kar
ḳhud apnī dhuup kā lashkar shajar pe Daal diyā

aaj bhī dhuup ke sajjāde pe namāz-e-mashaqqat maiñ ne paḌhī
aaj bhī mālik dozaḳh rakh dī tū ne mere bistar meñ

dhuup aur chhāñv musallam magar apnī had meñ
vaqt pāband nahīñ hai ki Thahar jā.egā

ye ab gharoñ meñ na paanī na dhuup hai na jagah
zamīñ ne 'talḳh' ye shahroñ ko bad-duā dī hai

jism-o-jāñ kī dhuup se jalte sahrā meñ
apnā saaya oḌh ke chaltā rahtā huuñ

khaḌā huuñ dhuup meñ saa.e kī justujū bhī nahīñ
ye kyā sitam hai ki ab terī aarzū bhī nahīñ

din ko gar dhuup kī chādar meñ sukūñ miltā hai
raat ab ḳhatm charāġh-e-saharī hotī hai

sub.h do ḳhāmoshiyoñ ko chaa.e piite dekh kar
gungunī sī dhuup utrī pyāliyoñ meñ aa ga.ī

har āñgan meñ aa.e tere ujle ruup kī dhuup
chhail-chhabelī raanī thoḌā ghuñghaT aur nikāl

bahut hī dhuup hai ab sā.ebāñ banā 'mohsin'
ḳhud apne saa.e meñ kab tak khaḌā rahegā vo

mausamoñ ke havāle tire naam se
dhuup chhāñv mere dil meñ hotī rahe

dhuup ke dasht meñ be-sāya shajar meñ ham the
munhamik phir bhī sarāboñ ke safar meñ ham the

safar zindagī kā rahā is tarah
kaḌī dhuup thī aur saaya nahīñ

jaane kahāñ hai aaj magar pichhlī dhuup meñ
dekhā thā ek abr kā TukḌā yahīñ kahīñ

sub.h jab dhuup ke chashme se nahā kar niklī
ham ne ā.īna badal terā sarāpā dekhā

sūraj kī tez dhuup se shāyad amaañ mile
ruktī hai ġham kī dhuup kahīñ sā.ebān se

sard-mehrī se kisī kī aage hī jī sard hai
yaañ se haT jā dhuup ai abr-e-ḳhirāmāñ chhoḌ kar

sāmne āñkhoñ ke phir yaḳh-basta manzar aa.egā
dhuup jam jā.egī āñgan meñ december aa.egā