Tags-Dhoop

koī tasvīr mukammal nahīñ hone paatī
dhuup dete haiñ to saayā nahīñ rahne dete

chamak aañkh meñ hairatoñ kī nahīñ
bas ik dhuup tāb-e-tamāshā kī hai

dukh-sukh jo dhuup chhāñv kā ik khel hai to phir
sūraj ke saath bādaloñ ke par use dikhā

vo aur hoñge jo kār-e-havas pe zinda haiñ
maiñ us kī dhuup se saaya badal ke aayā huuñ

kuchh manzil kā ġham baḌh jaatā kuchh rāheñ mushkil ho jātīñ
is taptī dhuup meñ zulfoñ kā saaya na milā achchhā hī huā

ukhḌī ukhḌī sī lagāvaT ko mohabbat na samajh
dhuup chamke to Thahartā nahīñ saaya apnā

bārish dhuup kī baat judā thī lā-mahdūd masāfat meñ
nañge sar par jaisā bhī thā gumbad-e-be-dar achchhā thā

dhuup thī saath jo din bhar vo kisī aur kī thī
kyā dhuñdlakā bhī sar-e-shām kisī aur kā hai

ret samjhaute kī ḳhātir nāchtī hai dhuup meñ
bādaloñ kī zid judā hai merī man-mānī alag

zindagī kī dhuup meñ jab duur tak jaanā paḌā
yaad aa.e terī zulfoñ ke ghane saa.e bahut

ġhurbat kī ThanDī chhāñv meñ yaad aa.ī us kī dhuup
qadr-e-vatan huī hameñ tark-e-vatan ke baad

bāhar kā dhan aatā jaatā asal ḳhazāna ghar meñ hai
har dhuup meñ jo mujhe saayā de vo sachchā saayā ghar meñ hai

ye tez dhuup ye kāñdhoñ pe jāgtā sūraj
zamīñ buland hai utnī ki āsmāñ kī raqīb

ġham-e-daurāñ kī kaḌī dhuup meñ chalne vaale
ba-tamannā-e-shab-e-māh chalā karte haiñ

ab 'inshā'-jī ko bulānā kyā ab pyaar ke diip jalānā kyā
jab dhuup aur chhāyā ek se hoñ jab din aur raat barābar ho

bujhtī sham.a kī sūrat kyuuñ afsurda khaḌe ho khiḌkī meñ
dekho shaam hai kis darja dilkash is dhuup kī vardī meñ

dhuup par maiñ koī tabsira kyā karūñ
chhāñv bhī ab to mujh ko jalāne lagī

din meñ ek miltī hai aur dūsrī shab meñ
dhuup jab bichhaḌtī hai chāñdnī sañvartī hai

us kī ḳhātir ronā hañsnā achchhā lagtā hai
jaise dhuup meñ bārish honā achchhā lagtā hai

kaḌaktī dhuup meñ dasht-e-safar se ghabrā kar
fasīl-e-shahr ke saa.e meñ aa ke baiTh rahe