Tags-Dhoop

ham ne apnī hirs-o-havas ko baḳhshī itnī tābānī
ab kī sadī meñ shāyad phaile bastī meñ zahrīlī dhuup

azmat kī mustahkam choTī shāyad us ko raas na aa.ī
har chaukhaT ko chhūne niklī shohrat kī rañgīlī dhuup

chanchal shoḳh-adā kirneñ to duur dishā tak jā pahuñchīñ
baiThī ḳhud ko kos rahī hai āñgan kī sharmīlī dhuup

qarya qarya kaañp rahā hai sard havā ke jhoñkoñ se
kitne āñgan garmā.egī tanhā ek akelī dhuup

jaane kitnī der chalegī saath mire chamkīlī dhuup
aane vaalā mausam laa.e shāyad giilī giilī dhuup

guzar to yuuñ bhī jā.egī kaḌaktī dhuup meñ tanhā
tire dāman ke saa.e meñ basar hotī to kyā hotā

huī jab dhuup kī bārish mire sar par to kyā hogā
daraḳhtoñ ke ghane sāyoñ meñ bhī sañvlā rahā huuñ maiñ

hai ye chhalnī mazār-e-'shād'-e-ġharīb
dhuup aatī hai laash par chhan kar

saat rañgoñ se banī hai yaad taaza
dhuup likh laa.ī mubārakbād taaza

tirī talab kī kaḌī dhuup meñ bhī huuñ lekin
atā ho abr-e-karam peḌ sāya-dār mujhe

nañge paañv dhuup meñ chalte rahne kī
koshish thī bekār safar kaise kaTtā

dhuup kā bojh saroñ par āḳhir aan girā
ḳhatm hue ashjār safar kaise kaTtā

vo kaḌī dhuup ke din vo tapish-e-rāh-e-vafā
vo savād-e-shab-e-gesū ke ghanere saa.e

peḌ miTTī dhuup paanī meñ adāvat ho ga.ī
phuul lagte hī sabhī bole samar merā bhī hai

dasht-e-vafā meñ jal ke na rah jaa.eñ apne dil
vo dhuup hai ki rañg haiñ kaale paḌe hue

kahtī hai sāhiloñ se ye jaate samay kī dhuup
hushyār naddiyoñ kī chaḌhā.ī kā vaqt hai

khilegī dhuup jab parchhā.iyāñ peḌoñ se nikleñgī
ye manzar bhī isī simTe hue manzar meñ rahtā hai

chand jismoñ ko dhuup meñ rakh kar
aaj parchhā.iyoñ ko gherā jaa.e

peḌ kī sūrat khaḌā rahtā hai merī mauj kī sarhad ke paas
mere sar par dhuup ke neze chamakte dekhtā rahtā hai vo

us ne rātoñ ke taqaddus ko kiyā hai majrūh
ek muTThī bhī jise dhuup mayassar huī hai