Tags-Dhoop

Dhalā hai husn lekin rañg hai ruḳhsār-e-jānāñ par
abhī baaqī hai kuchh kuchh dhuup dīvār-e-gulistāñ par

jaise har chiiz pighal jā.egī
dhuup yuuñ sar pe khaḌī rahtī hai

ġharīb dhuup jo bikhrī paḌī hai kamre meñ
sameTo aur na.e sūraj meñ Dhaal kar dekho

safar tavīl thā magar ghaTā uThī ummīd kī
kaḌī thī dhuup dekheñ kis pe sāya-e-ajal paḌe

dhuup ke qahr kī lazzat ke shaidā.ī haiñ
ye ashjār bhī ḳhvāb se chauñk paḌe hoñge

safar ye dhuup kā ab ḳhatm hone vaalā hai
chalegā saath mire koī saaya saaya kab

ga.ī jo dhuup to ab chāñdnī kī baarī hai
ki saath chhoḌegā merā ye kaalā saaya kab

'aḳhtar' agarche chāroñ taraf tez dhuup thī
dil par ḳhayāl-e-yār kī shabnam paḌī rahī

muzākarāt zamīñ kar rahī hai dhuup ke saath
kahīñ pe dekhī sunī tum ne itnī bārish hai

'mohsin'-ehsān kī is sāda-dilī ke sadqe
dhuup meñ DhūñDhtā phirtā hai mazā chhāñv kā

ab ke ghanghor ghaTā khul ke jo barse bhī to kyā
dhuup ne rañg hī kajlā diyā sahrāoñ kā

dhuup bhī chāñdnī hai sāya-e-ashjār se dekh
koī bāzār sahī chashm-e-ḳharīdār se dekh

jahāñ meñ kis ko gavārā huī hai fikr kī dhuup
har ik, koī shajar-e-sāya-dār māñge hai

utar ke dhuup jab aa.egī shab ke ziine se
uḌegī ḳhuun kī ḳhushbū mire pasīne se

chilchilātī dhuup kī nazroñ ne taakā hai vahīñ
sabz Tahnī par agar ik phuul bhī taaza lagā

vaqt ke chehre pe chaḌhtī dhuup kā ġhāza lagā
kuchh mire rañg-e-suḳhan kā is se andāza lagā

vahī mānūs thapeḌe the mire chāroñ taraf
mujhe hairat na huī dhuup kī tābānī par

dhuup niklī hai bārishoñ ke ba.ad
vo abhī ro ke muskurā.e haiñ

jo sonā chāho to darvāze band kar lenā
khulā rahegā ye kamra to dhuup jhāñkegī

maiñ dhuup sahrā meñ Duub jaane kī aarzū meñ taḌap rahī huuñ
mire nasīboñ meñ pyaas likhnā qadam qadam pe sarāb likhnā