Tags-Dhoop

zo.am hone kā rahā ik umr ham ko aur aaj
jal ga.e sab dhuup meñ jazbāt sūraj se kaho

dhuup kī tez tapish aur safar hai dar-pesh
sā.ebāñ koī yahāñ hai na shajar sāmne hai

rogī huā hai dhuup ko tarsā huā badan
ai māmtā supūt ko ghar se nikāl de

ham puure āftāb ke qābil nahīñ agar
thoḌī sī piilī dhuup hī āñkhoñ meñ Daal de

ishq kī jot jagāne meñ baḌī der lagī
saa.e se dhuup banāne meñ baḌī der lagī

ham ḳhush haiñ hameñ dhuup virāsat meñ milī hai
ajdād kahīñ peḌ bhī kuchh bo ga.e hote

dhuup saa.e kī tarah phail ga.ī
in daraḳhtoñ kī duā lene se

rāste bhar us ruup kī dhuup meñ jaan khapā.eñge maut kī had tak
chalte samay phir us kī zulf kī chhāñv meñ bisrām kareñge

bahut chalāyā gayā hai ham ko ḳhabar ho is tez dhuup ko ab
hamārā dasht-e-tapāñ meñ ik sā.ebān ījād ho rahā hai

charāġh huuñ mujhe jab dhuup raas aa na sakī
to ḳhud sikoḌ liyā apnā dā.era maiñ ne

sabz rakkhā hai jise maiñ ne lahū de ke 'qamar'
mehrbāñ dhuup meñ āḳhir vo shajar kab hogā

vo mujh ko aazmā ke kaḌī dhuup meñ rahā
mujh ko ḳhizāñ bahār lagī imtihān kī

saaya thā bhāgtā thā bahut merī dhuup se
vo shaḳhs ki jo mere gale se chimaT gayā

kaTtā nahīñ hai sard-o-siyah-rāt kā pahāḌ
sūraj thā saḳht dhuup thī din phir bhī kaT gayā

ḳhīragī aur tapish dhuup kī hai ba.ad kī baat
pahle ye shab to kaTe log sahar dekheñ to

akelā chhoḌ diyā dhuup meñ safar ke liye
us ek shaḳhs ne jo dil ke sā.ebān meñ thā

zindagī dhuup meñ guzārī hai
saa.e meñ hī chhupā liyā hotā

chalo ham dhuup jaise log hī us ko nikāl aa.eñ
sunā hai vo nadī tah meñ koī mah-pāra rakhtī hai

jahāñ Daale the us ne dhuup meñ kapḌe sukhāne ko
Tapaktī haiñ abhī tak rassiyāñ āhista āhista

ye hijr kā rāsta hai jis par maiñ tanhā tanhā sī chal rahī huuñ
bas us kī yādoñ kī dhuup hai aur maiñ qatra qatra pighal rahī huuñ