Tags-Dhoop

gumnāmiyoñ kī dhuup meñ jaltā nahīñ kabhī
jis sar pe sā.ebān hai urdū zabān kā

is ġham kī dhuup meñ mujhe purvā.iyāñ na do
jalne do apnī zulf kī parchhā.iyāñ na do

dhuup ke dasht meñ kitnā vo hameñ DhūñDtā thā
'e'tibār' us ke liye abr kī sūrat ham the

ḳhalā meñ rāste girte hoñ ābshār kī misl
vo dhuup ho nazar aa.e na rāsta mujh ko

uThne ko ranj-o-ġham ke bagūle haiñ dhuup meñ
sahrā-e-chashm meñ na banā rahguzar abhī

utrī hai paat paat pe pāgal rutoñ kī dhuup
chuñdhiyā rahī hai is liye merī nazar abhī

to kyuuñ ye sāhil kī dhuup mere niDhāl qadmoñ se aa lagī hai
mujhe kināre lagā diyā hai agar kisī shaḳhs kī duā ne

dhuup se rañg aur havā se kāġhaz uḌ jaate haiñ
zehn meñ ik tasvīr ḳhayālī rah jaatī hai

āñkheñ barseñ to TuuT kar barseñ
dhuup utre to be-hisāb utre

dhuup ab sar pe aa ga.ī hogī
kuchh namī dasht meñ bachī hogī

ab dhuup muqaddar huī chhappar na milegā
ham ḳhāna-ba-doshoñ ko kahīñ ghar na milegā

chār-sū ik barf-basta ahd-e-nam kā raaj hai
dhuup meñ hiddat nahīñ dariyāoñ meñ paanī nahīñ

duur haT jā sāya-e-mehrāb se
dhuup meñ ḳhud ko jalā kar raqs kar

sar pe hai ġham kī kaḌī dhuup kahāñ haiñ ahbāb
kaash do bol se hamdardī ke saayā karte

dhuup niklī kabhī bādal se Dhakī rahtī hai
raat din apnī hī ā.ankhoñ meñ jagī rahtī hai

sadiyāñ jin meñ zinda hoñ vo sach bhī marne lagte haiñ
dhuup āñkhoñ tak aa jaa.e to ḳhvāb bikharne lagte haiñ

ga.e mausam kī khulī dhuup na yādoñ pe paḌe
barf pighlegī to chaḌh jā.eñge dariyā mujh meñ

aadmī haiñ ham nahīñ haiñ peḌ par 'sābir' 'razā'
bāñTanā hogā kaḌaktī dhuup meñ saaya hameñ

dhuup kī ujlī chādar meñ
bāñdhā saayā donoñ ne

banā ke bhāñp dhuup ye uḌā na de hameñ kahīñ
hai jaan sard chhāñv kā kahāñ paḌāv kyā kareñ