Tags-Dil

un meñ hote haiñ qāfile pinhāñ
dil-shikasta na ho ġhubāroñ se

kyā hāl-e-dil sunā.eñ kyā vaj.h-e-ġham batā.eñ
bas ye ki āj-kal vo ham se khichā huā hai

mil gayā jab vo nagīñ phir ḳhūbi-e-taqdīr se
dil ko kyā kyā vahshateñ haiñ sañg kī tāsīr se

phir havā ke haath par bai.at ko dil betāb hai
aañkh phir raushan huī hai gard kī tahrīr se

kabhī kabhī to mujhe yaad tak nahīñ rahtā
ki chāñd jaltā hai shab meñ yā dil jalātī huuñ

dil-e-māyūs meñ vo shorisheñ barpā nahīñ hotīñ
umīdeñ is qadar TūTīñ ki ab paidā nahīñ hotīñ

ta.alluq dil kā kyā baaqī maiñ rakkhūñ bazm-e-duniyā se
vo dilkash sūrateñ ab anjuman-ārā nahīñ hotīñ

afsurda-dil ke vāste kyā chāñdnī kā lutf
lipTā paḌā hai murda sā goyā kafan ke saath

nafas ke taar kī girheñ ki kā.enāt ke ḳham
sarāb dil meñ thā sahrā ke ār-pār uThā

phir san se kahīñ purvā.ī chalī khilte nahīñ dekhī dil kī kalī
ye jhuuT hai barkhā hotī hai ye sach hai ki bādal rotā hai

bantī nahīñ dil se 'shāz' apnī ye dost hai yā dushman koī
ham haiñ ki musalsal hañste haiñ vo hai ki musalsal rotā hai

bhale mil jaa.e daulat aur shohrat ham ko duniyā meñ
magar dil ko mohabbat kī kamī achchhī nahīñ lagtī

surḳhi-e-shām ne yuuñ phuul bikhere dil meñ
jaise chupke se utar aa.e savere dil meñ

ham to sadiyoñ se yuuñ hī gosh bar-āvāz rahe
jaane vo kaun hai kyā raaz haiñ tere dil meñ

paas shab bhar koī ḳhurshīd-sifat rahtā hai
din to taare se utar aate haiñ mere dil meñ

pyaar kī lū se munavvar hai shabistān-e-visāl
aaj to aan mile shaam savere dil meñ

ham musāfir haiñ mohabbat kī kaThin rāhoñ ke
thak bhī jaate haiñ to karte haiñ basere dil meñ

kyuuñ bhaTaktā hai idhar aa ke zarā sustā le
is taraf dhuup hai bādal hai ghanere dil meñ

apnā sarmāya-e-fan phir bhī salāmat hī rahā
kitnī hī baar 'jamīl' aa.e luTere dil meñ

dil churā le ke ab kidhar ko chalā
ai tire chor kī kahī thī bhalā