Tags-Dost

ai dost gavārā hai mujhe ishq meñ sab kuchh
kuchh aur bhī kah lījiye badnām se pahle

shāyad tire laboñ kī chaTak se ho jī bahāl
ai dost muskurā ki tabī.at udaas hai

'manzar'-e-sāda-dil jinheñ dost samajh rahe the tum
aaj vahī vafā-sarisht ho ga.e ham se duur duur

kahāñ ke dost kaise aqrabā jab vaqt paḌtā hai
musībat meñ kisī kī dostī se kuchh nahīñ hotā

al-ġharaz qissa-e-do-lafz ye sun le ai dost
kūcha-e-yār ba-sad rañj na chhūTā ai hai

dhaḌkaneñ dil kī gine ḳhuuñ meñ ravānī māñge
zindagī ishq kī ai dost javānī māñge

bahut chhoTe haiñ mujh se mere dushman
jo merā dost hai mujh se baḌā hai

nigāh-e-dost dil-navāz bhī girah-kushā bhī thī
khulā jo dil pe zindagī kā bhed jī Thahar gayā

khā liyā hai to use dost ugalte kyuuñ ho
aise peḌoñ pe to aisā hī samar lagtā hai

dasht-e-ġhurbat meñ bhī zānū-e-dost par merī tanhā.ī ko ye ta.assur huā
bhūlā-bhaTkā huā ik musāfir koī yak-ba-yak jaise apne dayār aa gayā

allāh re jab.ha sā.i-e-ḳhāk-e-harīm-e-dost
bande ko banda sajde ko sajda banā diyā

ik dost mere qalb kī tālīf ke liye
kuchh zahr meñ bujhā.e hue tiir de gayā

sabr hijrāñ meñ kare 'kaifī'-e-mahzūñ kab tak
āḳhir ai dost koī hadd-e-shakebā.ī hai

tujh se mil kar to ye lagtā hai ki ai ajnabī dost
tū mirī pahlī mohabbat thī mirī āḳhirī dost

tere lahje kī thakan meñ tirā dil shāmil hai
aisā lagtā hai judā.ī kī ghaḌī aa ga.ī dost

ab bhī aa.e ho to ehsān tumhārā lekin
vo qayāmat jo guzarnī thī guzar bhī ga.ī dost

yaad aa.ī hai to phir TuuT ke yaad aa.ī hai
koī guzrī huī manzil koī bhūlī huī dost

tere qāmat se bhī lipTī hai amar-bel koī
merī chāhat ko bhī duniyā kī nazar khā ga.ī dost

maiñ use ahd-shikan kaise samajh luuñ jis ne
āḳhirī ḳhat meñ ye likkhā thā faqat aap kī dost

log har baat kā afsāna banā dete haiñ
ye to duniyā hai mirī jaañ ka.ī dushman ka.ī dost