Tags-Dua

māñgā kareñge ab se duā hijr-e-yār kī
āḳhir to dushmanī hai asar ko duā ke saath

go talḳh vo kaheñge lab-hā-e-shakkarīñ se
har dam duā magar ham ham-dam kiyā kareñge

maqbūl-e-duā ho na asar āh-o-fuġhāñ meñ
is daur meñ tāsīr-e-mohabbat ko huā kyā

phir se vo lauT kar nahīñ aayā
phir duā meñ asar nahīñ aayā

mire dil par bhī nāzil ho sakīnat
mire murshid mire haq meñ duā kar

saaqī ke aane kī ye tamannā hai bazm meñ
dast-e-subū buland hai dast-e-duā ke saath

bevafā.ī se vafāoñ kā sila mat denā
bad-duā dene se achchhā hai duā mat denā

yaad aa.e haiñ uff gunah kyā kyā
haath uThā.e haiñ jab duā ke liye

duā se kuchh na huā iltijā se kuchh na huā
butoñ ke ishq meñ yād-e-ḳhudā se kuchh na havā

yahī sahī ki ḳhushī se mile mile to sahī
yahī sahī ki hamārī duā se kuchh na huā

aate haiñ barg-o-bār daraḳhtoñ ke jism par
tum bhī uThāo haath ki mausam duā kā hai

shiddat-e-ġham meñ duā kī thī tujhe bhūlne kī
ab bhare zaḳhm to nādim huuñ ye kyā māñgā thā

tujhe ḳhudā.ī kā vāsta hai mirī duā kī bhī laaj rakhnā
maiñ tujh se umr-e-darāz māñgūñ tū mere haq meñ habāb likhnā

ġham-e-dil ab kisī ke bas kā nahīñ
kyā davā kyā duā kare koī

koī qadam na uThe sū-e-manzil-e-maqsūd
duā ye kar ki har ik raah pur-ḳhatar ho jaa.e

duā
duur tak ek ḳhalā

duniyā kī fasīloñ par hoñ amn kī ra.anā.ī
ne ḳhuun na ḳhanjar ho aao ye duā māñgeñ

kal aaj se behtar ho aao ye duā māñgeñ
mansūr-o-muzaffar ho aao ye duā māñgeñ

sāleh thā amal jab tak sardār rahe ham hī
phir ham meñ amal-gar ho aao ye duā māñgeñ

chhoTā na baḌā koī bande haiñ sabhī rab ke
aalī na ho kamtar ho aao ye duā māñgeñ