Tags-Dua

māyūs ho ga.ī hai duā bhī jabīn bhī
uThne lagā hai dil se ḳhudā kā yaqīn bhī

rog ban kar paḌā huā hai 'kañval'
tum davā ho, mirī duā tum ho

tumheñ duā bhī ham āsūdgī kī kaise deñ
jo ham ne dekhī hai āsūdgī agar hai yahī

bār-e-hastī to uThā uTh na sakā dast-e-savāl
marte marte na kabhī koī duā ham se huī

farishta sūrat duā kā saaya vo ruup insāñ kā dhaar aayā
hai us se duurī azaab mujh ko hai us kā milnā savāb jaisā

salāmtī kī duā kā samar banā huā hai
tumhāre baaġh kā paudā shajar banā huā hai

kis mast kī duā huī maqbūl-e-bārgāh
aayā hai jhuum jhuum ke abr-e-bahār aaj

kisī kī khoj meñ niklā huuñ mehr-o-māh liye
hai iltimās-e-duā duur tak añdherā hai

tū aane vaale kal ke liye kyuuñ hai fikrmand
tere liye maiñ apnī duā chhoḌ jā.ūñgā

vo chāhte haiñ un ke liye maiñ duā karūñ
shāmil is aarzū meñ mirī zaat kaise ho

barbād-e-mohabbat kī duā saath liye jā
TuuTā huā iqrār-e-vafā saath liye jā

gar ai qāsid tū us ke rū-ba-rū jaave ishāre se
duā merī bhī us ma.ashūq-e-kam-fursat se kah diijo

shikast vo thī ki jab merī sar-bulandī kī
mire adū ne mire vāste duā kī thī

merī āñkhoñ meñ sadā khilte raheñ ashkoñ ke phuul
aur tire ma.asūm hoñToñ par duā yūñhī rahe

duā ham roz karte haiñ 'duā' par hai yaqīñ ham ko
hameñ kāmil yaqīñ hai lauT kar ik din vo ā.eñge

sunñe vaale ro diye sun kar marīz-e-ġham kā haal
dekhne vaale taras khā kar duā dene lage

hijr kī shab nāla-e-dil vo sadā dene lage
sunñe vaale raat kaTne kī duā dene lage

ḳhudā kare tirī zulf-e-siyah kī umr darāz
kabhī balā mujhe lenā kabhī duā denā

tamām harb-o-jadal aazmā ke haar ga.e
uThāo dast-e-duā ab duā kī hājat hai

ye rog lagā hai ajab hameñ jo jaan bhī le kar Talā nahīñ
har ek davā be-asar ga.ī har ek duā be-asar huī