Tags-Dua

har kisī ke liye duā karnā
ḳhuub hotā hai yuuñ shifā karnā

ham bhī duā karte haiñ ki tum muḳhtār-e-sarīr-e-koh bano
lekin tum se milnā kyā hai patthar hī barsāoge

yahī rahegā agar mirī be-kasī kā aalam
duā.eñ bach pā.eñgī na dast-e-duā rahegā

vo hameñ jab tak nazar aatā rahā takte rahe
giilī āñkhoñ ukhḌe lafzoñ se duā dete hue

sab kuchh ḳhudā se maañg liyā tujh ko maañg kar
uThte nahīñ haiñ haath mire is duā ke ba.ad

dar-e-faqīr pe jo aa.e vo duā le jaa.e
davā-e-dard koī dard-e-lā-davā le jaa.e

ye mo.ajaza bhī kisī kī duā kā lagtā hai
ye shahr ab bhī usī be-vafā kā lagtā hai

maiñ kaisī sā.at-e-bad-baḳht meñ muqayyad huuñ
duā ḳhushī kī hai zāhir asar malāl kā hai

pyāre beTe tū ne iiñT gaare cement aur sariye vaalā makān to banā liyā hai
merī duā hai ki ye mohabbat amn ḳhushī aur ḳhush-hāl se bharā ghar ban jaa.e

aah jo siine se niklegī fuġhāñ ban jā.egī
ashk jo āñkhoñ se Tapkegā duā ban jā.egā

karte apne se baḌoñ kā haiñ jo dil se ehtirām
rahte haiñ ḳhush yuuñ buzurgoñ kī duā paate haiñ log

dast-e-aqdas se jo haath aa.e ġhanīmat jāniye
bad-duā ko bhī buzurgoñ kī duā paate haiñ log

aisā vīrān huā ka.aba-e-hastī yārab
rah ga.e haath uThe harf-e-duā bhuul ga.e

koī sā.ebāñ jo duā sā thā mirī raah meñ
vo nahīñ rahā to kahāñ rahī mirī oḌhnī

duā hī vaj.h-e-karāmāt thoḌī hotī hai
ġhazab kī dhuup meñ barsāt thoḌī hotī hai

paañv Tikte hī nahīñ ashkoñ ke
jaise āñkhoñ kī duā raqs meñ hai

maile libās kī duā pahuñche shabīh-e-shāḳh tak
shāhoñ ke paa.eñ baaġh meñ aisā mazār bhī nahīñ

vahī dard-e-musalsal vahī sarf-e-duā maiñ
basar hotī huī shab basar hotā huā maiñ

jab bhī milte haiñ to jiine kī duā dete haiñ
jaane kis baat kī vo ham ko sazā dete haiñ

dekho uThā hai vo bhī alāmat ke taur par
dast-e-darāz dast-e-duā se alag-thalag