Tags-Dua

bāġh-e-ālam meñ yahī merī duā hai roz-o-shab
ḳhaar ḳhaar ishq-e-gul-e-ruḳhsār toḌā chāhiye

phailā ke haath muft meñ hoñge zalīl ham
mahrūm tere dar se phiregī duā ġharaz

koī muzhda na bashārat na duā chāhtī hai
roz ik taaza ḳhabar ḳhalq-e-ḳhudā chāhtī hai

ye kis ne pyaar kī sham.oñ ko bad-duā dī hai
ujaaḌ rāhoñ meñ jaltī raheñ sadā ke liye

duā ke phuul kī ḳhushbū sā phailne vaalā
vo ḳhud meñ DhūñDhtā thā gum-shuda na jaane kyā

ik dast-e-duā kī narmī se ik chashm-e-talab kī surḳhī tak
ahvāl barābar hone meñ ik nasl kī vahshat jaagī hai

kuchh is tarah vo duā-o-salām kar ke gayā
mirī taraf hī ruḳh-e-intiqām kar ke gayā

'shāz' ab us kī ḳhamoshī ko duā denā hai
jis ne bheje the mujhe nāma-o-paiġhām ka.ī

merī maañ to mirī jannat ko liye baiThī hai
aisā kar lo mire purkhoñ kī duā tum rakh lo

dāman-e-qātil jo uḌ uḌ kar havā dene lage
kyā batā.ūñ zaḳhm-e-dil kyā kyā duā dene lage

maiñ kisī ke dast-e-talab meñ huuñ to kisī ke harf-e-duā meñ huuñ
maiñ nasīb huuñ kisī aur kā mujhe māñgtā koī aur hai

sote haiñ sab murād kā sūraj liye hue
rātoñ ko ab ye shahr duā māñgtā nahīñ

'arsh' tak dekhiye pahuñche ki na pahuñche koī
aah ke saath duā bhī mirī parvāz meñ hai

bīmār-e-mohabbat kī ab hai ye duā har-dam
phir shaam na ho jis kī aisī sahar aa jaa.e

māyūsiyoñ meñ yuuñ hī tamannā ujaaḌ dī
uTThe hue the haath duā kar ke dekhte

ye mashkūk aadmī luuTe haiñ jis ne kārvāñ barsoñ
duā māñgūñ kahīñ ye rahbar-e-manzil na ban jaa.e

duā hai merī maiñ zaḳhmoñ kī taab lā na sakūñ
sharāb maut kā jaage ḳhumār raqs karūñ

mirī duā hai ba-har-gām chāhatoñ kā safar
tire liye ho sitāroñ kī kahkashāñ laḌkī

ra.īsoñ kī ye bastī hai khaḌe haiñ raah meñ saa.il
kahegā haath meñ sikka duā le jā.egā koī

bad-duā koī agar de to burā mat maano
bad-duā bhī to mirī jaan duā hotī hai