Tags-Dua

o nañg-e-e.atibār duā par na rakh madār
o bevaqūf himmat-e-mardāna chāhiye

tirā ġham samā gayā hai mire dil kī dhaḌkanoñ meñ
koī aish jab bhī aayā mire dil ne bad-duā dī

zulf ke janjāl meñ phañsne kī ḳhud kartā duā
maiñ siḌī thā jo ḳhudā se apnī shāmat māñgtā

'aish' āsūdgī dārain kī ho tujh ko nasīb
hai duā ye hī mirī ḳhāliq-e-javvād se ab

koī zaḳhm khulā to sahne lage koī Tiis uThī lahrāne lage
ye kis kī duā kā faiz huā ham kyā kyā kaam dikhāne lage

jabīñ ko chain kahāñ zer-e-lab duā hai bas
talab kī chaah kā ik tū hī aasrā hai bas

apnī sī tū to kar unheñ phir iḳhtiyār hai
sunñā hai un kā kaam pahuñchnā duā kā kaam

na koī chashm-e-tamannā na koī dast-e-duā
zindagī tū mujhe be-laus guzar jaane de

dete haiñ duā dard ke maare use kahnā
palkoñ se zarā bojh utāre use kahnā

hālat-e-ġhair pe yuuñ ḳhair se hañsne vaale
is tavajjoh kī bhī ham tum ko duā dete haiñ

kosne dete haiñ jis vaqt butān-e-tannāz
haath uThā.e hue ham un ko duā dete haiñ

'dāġh' kal to duā aap kī maqbūl na thī
aaj muñh-māñgī murād aap ne paa.ī kyūñkar

shab-o-roz naḳhl-e-vajūd ko nayā ek barg-e-anā diyā
hameñ inhirāf kā hausla bhī diyā to misl-e-duā diyā

niiñd aatī hai duā de ke chalī jaatī hai
ashk jab kartā hai ārām mirī āñkhoñ meñ

vo baḌā rahīm o karīm hai mujhe ye sifat bhī atā kare
tujhe bhūlne kī duā karūñ to mirī duā meñ asar na ho

haath uThte hue un ke na koī dekhegā
kis ke aane kī kareñge vo duā mere baad

ik baar guzartā hai dil dard kī rāhoñ se
rag rag se taḌaptī hai tāsīr-e-duā barsoñ

bāhar nikal ke jism ke zindāñ se ek din
maiñ tujh ko zindagī kī duā dene ā.ūñgā

apne saaqī ko shab-e-furqat meñ
paanī pī pī ke duā karte haiñ

ḳham-e-abrū-e-sanam ko dekheñ
ham ye kaabe meñ duā karte haiñ