Tags-Dua

tujh ko jo de duā to ḳhudā rad nahīñ kare
aisā koī faqīr-o-qalandar talāsh kar

maiñ amal se ḳhālī thā is liye
merā zor saarā duā pe thā

māthe kī biñdī haath kī rākhī duā ke bol
bīmār ke qarīb masīhā.ī meñ Dhale

hāthoñ ke irti.āsh meñ bād-e-murād hai
chaltī haiñ kashtiyāñ ki duā kar rahe haiñ ham

be-kār jab duā hai davā kyā karegī aaj
aise meñ zindagī bhī vafā kyā karegī aaj

vo zamīn ho ki ho āsmāñ ye diyā hamesha jalā rahe
maiñ kisī safar meñ rahūñ magar mire saath maañ kī duā rahe

na.e zaḳhm haiñ na.ī koñpleñ abhī dil pe ġham kī bahār hai
ye duā karo ki ḳhizāñ meñ bhī ye daraḳht yūñhī harā rahe

ek dushman ki charḳh hai na rahe
tujh se ye ai duā nahīñ hotā

jo dukh paḌegā sahā karūñgī jase kahoge rahā karūñgī
tuman kuuñ nis din duā karūñgī sakhī salāmat raho ḳhudā-yā

ḳhamoshiyoñ meñ sadā se likhā huā ik naam
suno hai dast-e-duā se likhā huā ik naam

maiñ dast-e-duā us kī taraf kyūñki uThā.ūñ
hotā hī nahīñ charḳh se maqsūd-e-ḳhalā.iq

maiñ aaj gaañv meñ chhoḌe to jā rahā huuñ tumheñ
duā karo ki mujhe shahr kī havā na lage

ḳhudā vo vaqt na laa.e hamāre bachchoñ par
ki jis ghaḌī unheñ maaoñ kī bhī duā na lage

mirī duā ko palaTnā thā phir udhar 'mohsin'
bahut ujaaḌ the manzar ufuq se paar ke bhī

ye shahr sehr-zada hai sadā kisī kī nahīñ
yahāñ ḳhud apne liye bhī duā kisī kī nahīñ

saare malāmatoñ ke tiir jin kā hadaf bane the ham
apne liye vo tiir bhī kaam duā kā kar ga.e

aa bhī jaao ki duā maañg rahā huuñ kab se
baat rah jaatī hai aur vaqt guzar jaatā hai

apne ḳhudā se silsila-e-guftugū na toḌ
ho jaa.e jo qubūl to aisī duā na maañg

mirā haal pūchh ke ham-nashīñ mire soz-e-dil ko havā na de
bas yahī duā maiñ karūñ huuñ ab ki ye ġham kisī ko ḳhudā na de

vo hai jo mere qatl kā sāmāñ kiye hue
merā nahīñ shi.ār ki maiñ bad-duā karūñ