Tags-Dua

mire dil ko shauq-e-fuġhāñ nahīñ mire lab tak aatī duā nahīñ
vo dahan huuñ jis meñ zabāñ nahīñ vo jaras huuñ jis meñ sadā nahīñ

rah jaa.eñ kisī taur mere ḳhvāb salāmat
is ek duā ke liye ab haath uThā.ūñ

dast-e-duā uThā to uThā us ke hī huzūr
lekin ye kyā usī se mukartā huā sā maiñ

phir ho.e fuzūñ daulat 'aḳhtar' ye duā de tū
ye faqra-e-pīrāna ik raaj se afzūñ hai

chalegā tiir jab apnī duā kā
kaleje dushmanoñ ke chhān degā

shāḳheñ hāthoñ meñ liye kitnī adhūrī kaliyāñ
māñgtī haiñ faqat ik narm sī jumbish kī duā

ye tire dast-e-karam ko khīñch legā ek din
ai ḳhudā rahne na de dast-e-duā saa.il ke paas

ḳhāmosh ho kyuuñ dād-e-jafā kyuuñ nahīñ dete
bismil ho to qātil ko duā kyuuñ nahīñ dete

jab kuchh na milā haath duāoñ ko uThā kar
phir haath uThāne hī paḌe ham ko duā se

sunte haiñ ki mil jaatī hai har chiiz duā se
ik roz tumheñ maañg ke dekheñge ḳhudā se

jo tum ho paas to kahtā hai mujh ko chiir ke pheñk
vo dil jo vaqt-e-duā be-zabān lagtā hai

ai asar kar na intizār-e-duā
māñgnā saḳht be-hayā.ī hai

ye ab gharoñ meñ na paanī na dhuup hai na jagah
zamīñ ne 'talḳh' ye shahroñ ko bad-duā dī hai

duā salām to thī rasm-e-rab se thī murād
so mere shahr ne ye rasm hī uThā dī hai

davā meñ aur duā meñ to ab asar ma.alūm
bas ik umīd-e-asar zabt-e-nāgavār meñ hai

ham ḳhud bhī hue nādim jab harf-e-duā niklā
samjhe the jise patthar vo shaḳhs ḳhudā niklā

saa.il ke laboñ par hai duā aur tarah kī
aflāk se aatī hai sadā aur tarah kī

hameñ rizq kī kuchh zarūrat paḌegī
duā pak rahī hai gunahgār dil meñ

ye jaan lo ki haath uThāne kī der hai
ḳhālī ga.ī na jā.egī apnī duā kabhī

ahl-e-talab pe us ke liye farz hai duā
ḳhairāt meñ vo chand nivāle to de gayā