Tags-Dua

vo ḳhauf hai ki badan pattharoñ meñ Dhalne lage
ajab ghaḌī ki duā bhī nahīñ laboñ pe koī

ek mushkil kā vaqt vo hogā
jab duā mustajāb ho jaa.e

ye kis kī bad-duā kī hai tāsīr yā-ḳhudā
jis ne mirī duāoñ se tāsīr chhīn lī

ye duā haq se hai mirā 'mātam'
dafn ho karbalā-muallā meñ

duā kā dar to sabhī ke liye khulā hai magar
jise yaqīn ho is par savāl kartā hai

jise chain merā aziiz ho mujhe umr kī vo duā na de
hai qazā kī ab mujhe aarzū mire rab mujhe tū shifā na de

tum ne māñgī hai duā Thiik hai ḳhāmosh raho
baat patthar meñ utartī hai magar āhista

aflāk se lauTī hai duā aa ke zarā dekh
har harf ke chehre pe tujhe sog dikheñge

mere marne kī sahī jaañ se guzarne kī sahī
mere haq meñ tere hoñToñ pe duā to aa.ī

duā karo ki ḳhizāñ meñ hī chand phuul khileñ
ki ab ke mausam-e-gul meñ gulāb aa.e nahīñ

daulat nahīñ jab tak ye zubūñ rahte haiñ
mehrāb-e-duā meñ sar-nigūñ rahte haiñ

to samundar aur merī zaat ik qatra sahī
terī rahmat har taraf merī duā apnī jagah

maiñ apne haq ke sivā māñgtā agar kuchh aur
to mere harf-e-duā meñ asar nahīñ rahtā

yaaro kahāñ tak aur mohabbat nibhā.ūñ maiñ
do mujh ko bad-duā ki use bhuul jā.ūñ maiñ

kyuuñ zindagī ko jabr-e-musalsal kā naam deñ
kyuuñ ārzū-e-maut ko dast-e-duā kī shart

qāsid us kā payām kuchh bhī hai
kah duā yā salām kuchh bhī hai

ye ittifāq nahīñ haiñ koī duā hai jo
yuuñ hādsoñ se musalsal bachā rahī hai mujhe

sunā hai dard se 'ahyā' qalam meñ zor miltā hai
so maiñ ne bhī duā kar lī mujhe bhī pyaar ho jaa.e

haath uThte hī kaTā chaliye yahāñ se chaliye
kyā duā kaisī duā chaliye yahāñ se chaliye

us dushman-e-vafā ko duā de rahā huuñ maiñ
merā na ho sakā vo kisī kā to ho gayā