Tags-Dua

vo āsmānoñ meñ rahne vaalā sunegā ik din tirī 'alīnā'
sadā ko apnī buland rakh tū duā meñ jab tak asar na aa.e

vahī bujhāte haiñ phū.koñ se chāñd tāroñ ko
ki jin kī shab ke ujāloñ kī ham duā māñgeñ

vaqt-e-shām palkoñ par jhilmilā uTheñ taare
shāmil-e-duā 'anjum' kā bhī naam kar lenā

mujh ko paanā ho to har lamha talab kar na mujhe
raat ke pichhle pahar māñg! duā huuñ maiñ bhī

ya.anī ki maiñ ḳhudā se bahut duur ho gayā
uThte nahīñ duā ko mire haath in dinoñ

adāvatoñ meñ jo ḳhalq-e-ḳhudā lagī huī hai
mohabbatoñ ko koī bad-duā lagī huī hai

shab intizār-e-sahar hai sahar ke ba.ad hai kyā
duā barā-e-asar hai asar ke ba.ad hai kyā

bām-e-ummīd se palTī huī nākām duā
bāryābī kā koī aur hunar māñge hai

lams-e-jānāna liye mastī-e-paimāna liye
hamd-e-bārī ko uThe dast-e-duā āḳhir-e-shab

kisī duā ke liye haath uThe hue 'shāhid'
kisī diye ke liye tāqcha banā huā hai

siine se maiñ duā ko laayā jo shab laboñ tak
kahne lagī ijābat kīdhar ḳhayāl aayā

jalā ke jab saarī kashtiyāñ maiñ samundaroñ kī banī ġhizā thī
usī ghaḌī to jabīn-e-shab par likhī ga.ī merī bhī duā thī

ahl-e-dil ne hī bharam rakkhā ġhurūr-e-husn kā
varna tum bhī kah uThe the ab duā karnā paḌī

har vafā nā-āshnā se bhī vafā karnā paḌī
dil se dushman ke liye aksar duā karnā paḌī

tirā hunar tirī dānā.ī bad-duā hai 'imām'
zavāl terā muqaddar kamāl kartā jā

jo duā māñgī vo phir vāpas na aa.ī hijr meñ
haath ham apne pasāre yuuñ ke yūñhīñ rah ga.e

aayā jo mehrbāñ ho sitamgar tū is taraf
kis vaqt kī na jāniye tujh ko duā lagī

agarche tishna-nigāhī misāl-e-sahrā hai
nahīñ hai dast-e-duā ko tire karam kā jigar

us kī qubūliyat meñ koī shak nahīñ rahā
bheje haiñ ham ne ashk bhī ab ke duā ke saath

batā rahe haiñ falak ko dushman vo muntaqim hai kare jo chāhe
uThe hue haiñ jo haath apne tasavvur us ko duā na karnā