Tags-Dua

vo apnī jhurriyoñ vaalī hathelī meñ duā bhar kar
jo chhū dete haiñ merā sar to merā sar mahaktā hai

ġham-e-ishq meñ kaarī davā na duā ye hai rog kaThin ye hai dard burā
ham karte jo apne se ho saktā kabhī ham se bhī kuchh na kahā tum ne

mauhūm sī umiid huuñ mujh se gurez kyā
apnī kisī duā kā asar huuñ zarā Thahar

yahī duā hai vo jab ho jamāl se āgāh
libās-e-nāz bhī pahne to dūsrā na lage

dabā ke qabr meñ sab chal diye duā na salām
zarā sī der meñ kyā ho gayā zamāne ko

muntazir chaukhaT pe ta.abīroñ ke shahzāde rahe
ḳhvāb kī shahzādiyāñ qasr-e-duā meñ kho ga.iiñ

ḳhudā kare ki hameñ vo duā na koī de
hameñ to kosnā hī us kā raas lagtā hai

aate haiñ barg-o-bār daraḳhtoñ ke jism par
tum bhī uThāo haath ki mausam duā kā hai

vo momin bhī hai māñgegā duā sidq-e-tanāsuḳh kī
tire hāthoñ se marnā jis ko ai qātil pasand aayā

to kyā rābta phir ḳhudā kā bashar se
ta.alluq nahīñ jab duā kā asar se

ki maañ ḳhvāb meñ māthā sahlā rahī thī
Darūñ kyā maiñ ab bad-duā bad-nazar se

tum bahut ma.asūm laḌkī ho tumheñ
nazm bhejūñgā duā pahnā.ūñgā

koī chārā nahīñ duā ke sivā
koī suntā nahīñ ḳhudā ke sivā

duā ye hai na hoñ gumrāh ham-safar mere
'ḳhumār' maiñ ne to apnā safar tamām kiyā

aaj tak jo bhī huā us ko bhulā denā hai
aaj se tai hai ki dushman ko duā denā hai

aate jaate hue mausam ko duā dete raho
kam se kam shāḳh-e-tamannā to samar-dār rahe

tajalliyoñ se añdheroñ kī jañg jaarī hai
ujāle surḳh-rū hoñ ye duā hamārī hai

dukh aur tarah ke haiñ duā aur tarah kī
aur dāman-e-qātil kī havā aur tarah kī

tirī ye dushman-e-jāñ ko duā jabīn-e-niyāz
ki tū rahe ye terā sañg-e-āstāñ bhī rahe

laao kahīñ se sañg-e-malāmat hī kyuuñ na ho
yaaro shikast-e-shīsha-e-dil kī duā karo