Tags-Dua

kis qadar nādim huā huuñ maiñ burā kah kar use
kyā ḳhabar thī jaate jaate vo duā de jā.egā

uThā ke haath duā māñgnā hī baaqī hai
vagarna kar chukā sab kuchh jo iḳhtiyār meñ thā

diloñ par qahr kā mausam hai kaisā
mirī bastī duā par chal rahī hai

us se kahnā ki kyā nahīñ us paas
phir bhī darvesh kī duā le jaa.e

izzat-e-nafs rakh sako mahfūz
aur is ke sivā duā kyā hai

din ke sahrā meñ bahut der se shaam aatī hai
us se milne kī duā shaam se vābasta hai

bhuul hī jaa.eñ ham ko ye to na ho
log mere liye duā na kareñ

mumkin hai shab-e-hijr duā kā na asar ho
hai raat vo kyā raat ki jis kī na sahar ho

bārish-e-sañg meñ bhī aa.ī duā hoñToñ par
sab ne kam-tar jise jaanā thā vo aalī niklā

sabhī ko de rahā thā vo duā jiine kī sadiyoñ tak
hamāre shahr ke sab log us ko bad-zabāñ samjhe

zabāñ ḳhāmosh hai lab band haiñ himmat shikasta hai
duā se haath uThā.e haiñ to ab koī duā kyuuñ ho

mirī zindagī kī haqīqatoñ ko na pūñchh aur maiñ kyā kahūñ
mirā dost aaj vahī hai jo mujhe zindagī kī duā na de

māñgī thī ek baar duā ham ne maut kī
sharminda aaj tak haiñ miyāñ zindagī se ham

bhaa.ī duā kā shīsh-mahal bhī hai koī chiiz
hāthoñ meñ bad-duāoñ ke patthar hī rah na jaa.eñ

ik dard ho bas aaTh pahar dil meñ ki jis ko
taḳhfīf davā se ho na taskīn duā se

dar guzre davā se to bharose pe duā ke
dar guzreñ duā se bhī duā hai ye ḳhudā se

pukār leñge us ko itnā aasrā to chāhiye
duā ḳhilāf-e-vaza.a hai magar ḳhudā to chāhiye

naam 'akbar' to mirā maañ kī duā ne rakkhā
haañ bharam us kā magar mere ḳhudā ne rakkhā

kabhī jo gāliyāñ de maañ to ye samajh lenā
ki us kī gaalī kā matlab duā bhī hotā hai

ḳhvāhisheñ aur baḌhtī jā.eñgī
kyā yahī hāsil-e-duā hogā