Tags-Duniya

ahl-e-duniyā se kyā badī kā gilā
ai 'tapish' tū ne kis se kī nekī

umīd-o-bīm ke mehvar se haT ke dekhte haiñ
zarā sī der ko duniyā se kaT ke dekhte haiñ

nahīñ duniyā meñ sivā ḳhār-o-ḳhas-e-kūcha-e-dost
sar-e-shorīda kī ḳhvāhish ba-kulāhe gaahe

kuchh aaise bhā ga.e hameñ duniyā ke dard-o-ġham
kū-e-butāñ meñ bhūlī huī yaad ham hue

saarī duniyā ke kaam aate haiñ
ek tum se vafā nahīñ hotī

ishq to ek hī se hotā hai
saarī duniyā ḳhudā nahīñ hotī

dard meñ lazzat bahut ashkoñ meñ ra.anā.ī bahut
ai ġham-e-hastī hameñ duniyā pasand aa.ī bahut

be-ḳhayālī meñ bhī kitne fāsle tai ho ga.e
be-irāda bhī ye duniyā duur le aa.ī bahut

suḳhan fareb koī mehrbāñ kī tarah
dayār-e-husn hai duniyā kī dāstāñ kī tarah

īmān o diiñ se 'tābāñ' kuchh kaam nahīñ hai ham ko
saaqī ho aur mai ho duniyā ho aur ham hoñ

ham ne duniyā hī meñ jannat kā mazā luuT liyā
mehrbāñ ham pe jo vo huur huā ḳhuub huā

ye sarf-o-hāsil-gazīda duniyā na din hī mere na merī rāteñ
kahāñ talak dekhtā hī jā.ūñ samā.ateñ kuchh nazar meñ rakh de

use dekhā to har be-chehragī kaasa uThā laa.ī
tamannā apne ḳhālī haath meñ duniyā uThā laa.ī

kahāñ tak mujh ko Thukrā.egī duniyā
kabhī to ḳhud ko samjhā.egī duniyā

miyāñ dil se ġhalat-fahmī nikālo
tumhāre bin bhī chal jā.egī duniyā

mujhe bhī rok hī legā zamāna
tumheñ bhī yaad aa jā.egī duniyā

ise apnā nahīñ hai hosh 'anvar'
tumheñ kyā ḳhaak samghā.egī duniyā

rañg-e-duniyā bhī ik tamāshā hai
apne hāthoñ meñ ik khilaunā huuñ

kyā ye duniyā hī chāh-e-bābul hai
aadmī huuñ yā maiñ farishta huuñ

sajā.e rakhtā hai ḳhvāb-o-ḳhayāl kī duniyā
haqīqatoñ kā vo kab e'tirāf kartā hai