Tags-Duniya

sarā.e meñ koī ik shab ruke to baat hai aur
magar savāl hai duniyā ko ghar banāne kā

koī hamdam nahīñ duniyā meñ lekin
jise dekho vahī hamdam lage hai

tez raftārī ne duniyā kī uḌāyā ye ġhubār
har samāñ dhuñdlā gayā us ā.ina-paikar samet

saarī duniyā se duur ho jaa.e
jo zarā tere paas ho baiThe

mire habīb bahut kam-sabāt hai duniyā
mire habīb bas ab haath imtihāñ se uThā

isī duniyā meñ haiñ kitnī hī duniyā
sabhī ke apne apne mas.ale haiñ

mujhe ab dekh kar hañstī hai duniyā
maiñ sab ke sāmne rone lagā thā

bhaTaknā chāhūñ bhī to duniyā muḳhtasar nikle
jidhar baḌhā.ūñ qadam terī rahguzar nikle

naqsh-e-hairat ban ga.ī duniyā sitāroñ kī tarah
sab kī sab āñkheñ khulī haiñ jāgtā koī nahīñ

raaz bulandī ke duniyā se chhupāte haiñ
sīḌhī se chup-chāp utarne vaale log

duniyā ye dukhī hai phir bhī magar thak kar hī sahī so jaatī hai
tere hī muqaddar meñ ai dil kyuuñ chain nahīñ ārām nahīñ

duniyā hai is kī shāhid is shahr-e-be-amāñ ne
jis meñ anā samā.ī vo sar kuchal diyā hai

pindār-e-hunar zauq-e-nazar shiddat-e-iḳhlās
duniyā ke muqābil mire lashkar nikal aa.e

jāgtā huuñ maiñ ek akelā duniyā sotī hai
kitnī vahshat hijr kī lambī raat meñ hotī hai

kitābat se na jo sīkhā vo duniyā ne sikhāyā hai
ḳhushī kitnī bajā ho dard se pinhāñ nikaltī hai

saarī duniyā se hama-vaqt juḌā rahtā huuñ
rābta ḳhud se magar aaj bhī kam merā hai

jahāñ maiñ huuñ magar kyā jāniye kyuuñ
mujhe duniyā se matlab kuchh nahīñ hai

shabāb aayā kisī but par fidā hone kā vaqt aayā
mirī duniyā meñ bande ke ḳhudā hone kā vaqt aayā

ba.ad meñ dil se ga.ī shīrīnī
zahr duniyā ne bharā thā pahle

umr bhar duniyā ko samjhātā rahā
ḳhud fareb-e-zindagī khātā rahā