Tags-Duniya

jaane kyā chiiz chhupī hai tire jalvoñ meñ sanam
saarī duniyā tere jalvoñ pe fidā hotī hai

kyā zarūrat ki kareñ chal ke tavāf-e-duniyā
fikr apnī ye agar gañg-o-jaman tak pahuñche

badal ke ḳhud hī hamīñ rah ga.e zamāne meñ
chale the ghar se ki duniyā badal ke dekhte haiñ

ishq in zālimoñ kī duniyā meñ
kitnī mazlūm zaat hai ai dil

is qadar yaas bhī hotī hai kahīñ duniyā meñ
ro diye ham jo tirī chashm-e-ināyat dekhī

bas ḳhalāoñ se nazar aa.ī mirī duniyā use
vo samajhtā hai ki andar hai bapā kuchh bhī nahīñ

ye duniyā jab talak qaa.em hai 'naushād'
hamāre giit dohrātī rahegī

zavāl-e-jāh o daulat meñ bas itnī baat achchhī hai
ki duniyā meñ ba-ḳhūbī aadmī pahchān jaatā hai

ye duniyā-dārī aur irfān kā daavā 'shujā-ḳhāvar'
miyāñ irfān ho jaa.e to duniyā chhoḌ dete haiñ

haañ dekhiyo irfān-e-baġhāvat na jhulas jaa.e
manzar mirī duniyā kā sharar-bār bahut hai

un par bhī hañstī thī duniyā āvāzeñ kastī thī duniyā
'jālib' apnī hī sūrat the ishq meñ jaañ se jaane vaale

tishnagī apnī miTā le ki hañsnegī duniyā
pī to le sāġhar-e-taslīm-o-razā rakkhā hai

ḳhūgar-e-zabt haiñ rusvā na kareñge tujh ko
ham ne duniyā se tire ġham ko chhupā rakkhā hai

badal Daalā hai duniyā ko jo fir.aunoñ kī bastī meñ
ḳhudā ne aaj shāyad phir bashar se baat karnī hai

dam bhar kī hañsī dam bhar kī ḳhushī ye bhī to dil-e-nākām nahīñ
is chaltī-phirtī duniyā meñ sab kuchh hai magar ārām nahīñ

duniyā ke bhare bāzāroñ meñ yuuñ suntā huuñ apnā afsāna
jaise ki ye merā zikr nahīñ jaise ki ye merā naam nahīñ

bijlī kī chamak meñ sho.ale haiñ phūloñ kī hañsī meñ aañsū haiñ
ye 'fazl' vafā kī duniyā hai phir bhī to vafā kā naam nahīñ

duniyā bhar kī rām-kahānī kis kis Dhañg se kah Daalī
apnī kahne jab baiThe to ik ik lafz pighaltā thā

aage aage bhaag rahā huuñ ab vo mere pīchhe hai
ik din terī chaah meñ kī thī maiñ ne duniyā ek taraf

aap kī duniyā alag aur alag apnā jahāñ
rāste jab na hoñ manzil pe milā kaise kareñ