Tags-Duniya

ek duniyā hai yahāñ ek zamāna hai yahāñ
yūñhī har aan rahe ye mirā dīvāñ ābād

begāna ho ke bazm-e-jahāñ dekhtā huuñ maiñ
duniyā ke rañg-o-bū kā samāñ dekhtā huuñ meñ

kahne ko muḳhtasar sā ik lafz hai mohabbat
lekin usī meñ saarī duniyā chhipī huī hai

duniyā tere matlab kī hai tū duniyā ke matlab kā
aur donoñ ke paas nahīñ hai kuchh bhī mere matlab kā

din guzar jaatā hai duniyā kī masāfat meñ magar
raat hī ik imtihāñ hai jis kā andāza na thā

in rishtoñ kī bhiiḌ meñ akasr mujh ko aisā lagtā hai
saarī duniyā apnī sagī hai lekin apnā kuchh bhī nahīñ

ik din sambhal hī jaatā hai duniyā se haarā shaḳhs
lekin jo apne-āp se haare hamāre dost

kho.e huoñ ko DhūñDne niklā thā āftāb
duniyā to mil ga.ī sar-e-bāzār aur maiñ

ham ko mastī o ḳhvārī aa.ī
tum ko duniyā-dārī aa.ī

nahīñ hai fursat yahīñ ke jhagḌoñ se fikr-e-uqbā kahāñ kī vaa.iz
azāb-e-duniyā hai ham ko kyā kam savāb ham le ke kyā kareñge

duniyā ek samundar jis meñ
maiñ huuñ koī jazīra tanhā

'kāshir' kī hai apnī hī duniyā
hogā kahīñ par baiThā tanhā

be-parastish bashariyyat nahīñ rah saktī hai
but ho mahbūb ho duniyā ho ḳhudā ho kuchh ho

is dasht-e-be-ḳhudī meñ ki duniyā kaheñ jise
ġhāfil sabhī haiñ ik nigah-e-yār ke sivā

jā ki tujh ko muaaf karte haiñ
ranj-e-duniyā yahāñ alag hai kuchh

duniyā simaT ke ek hī nukte meñ aa ga.ī
ham ne jab apnī zaat ke andar safar kiyā

mujhe shāyad bhulā paa.e na duniyā
maiñ apne ahd kā ik hādsa huuñ

umr-bhar ke liye ho jaao kisī ke 'aḳhtar'
ishq aisā karo duniyā kī misāloñ meñ raho

diloñ ke band darīchoñ se jhāñk kar dekho
kisī fasād kī parchhā.iyāñ haiñ duniyā meñ

jhīleñ aur parinde is meñ rahte haiñ
merī duniyā ek darīcha ek ḳhayāl