Tags-Duniya

un kī yādoñ se huī nam aañkh ko
aap duniyā se chhupānā sīkhiye

duniyā isī kā naam hai har samt hī yahāñ
ban kar yaqīñ gumān ke mehvar bhī ā.eñge

kab tak ye mirā zo.am ye ehsās rahegā
duniyā meñ bahut ḳhuub hai kashmīr ziyāda

merī duniyā meñ lagī jo aag to sab jal gayā
raakh se hasrat hai uTThe bhī dhuāñ to kyā huā

khaTak rahā huuñ har ik kī nazroñ meñ bach ke chaltī hai mujh se duniyā
zahe girāñ-bārī-e-mohabbat ki dosh-e-hastī pe baar huuñ maiñ

duniyā se kuchh nahīñ hai sarokār ab mujhe
be-shak mire liye mujhe tanhā.ī chāhiye

mohabbat raas aatī hai to chhā jaatī hai duniyā par
bigaḌtī hai to phir nām-o-nishāñ baaqī nahīñ rahtā

kār-e-duniyā se ulajhtī haiñ jo sāñseñ apnī
zaḳhm ginte haiñ kabhī misra-e-tar DhūñDte haiñ

jab bhī mil jaatī hai fursat ġham-e-duniyā se 'shakeb'
yaad kar ke unheñ tanhā.ī meñ ro letā huuñ

hazāroñ aib chhupāne ko lag ke duniyā meñ
badan pe rakhte haiñ zarrīñ libās kā paanī

yuuñ hī qaa.em nahīñ hai ye duniyā
log achchhe haiñ is jahān meñ kuchh

merī duniyā ko lūTne vaalī
aag lag jaa.e tujh ko mar jaanī

ab kisī aur salīqe se satā.e duniyā
jī badalne lagā asbāb-e-pareshānī se

kahīñ is mālūm sī duniyā meñ koī nā-mālūm sī duniyā hai
koī us ke bhed batātā hai par jaane kaun batātā hai

koī kahtā hai ye duniyā hai aur tere liye hai ye duniyā
koī is se ḳhauf dilātā hai par jaane kaun dilātā hai

mujhe duniyā apnī chhab dikhlāne roz chalī aatī hai magar
koī donoñ biich aa jaatā hai par jaane kaun aa jaatā hai

tavajjoh huuñ magar markūz duniyā par huuñ kab se
ab aap apnī taraf mabzūl honā chāhtā huuñ

ham se bhī kuchh kah lo sun lo ai jaane vaalī raato
ham bhī to haiñ is duniyā meñ do ghaḌiyoñ ke mehmān

ilzām-tarāshī to 'sāġhar' duniyā kā purānā sheva hai
yūsuf pe zamāne kā tujh ko kyā uñglī uThānā yaad nahīñ

uḳhuvvat ke parastāroñ kī ik rañgīn duniyā thī
harīm-e-nūr-o-naġhma bazm-e-nāhīd-o-surayyā thī