Tags-Duniya

duniyā kahāñ thī pās-e-virāsat ke zimn meñ
ik diin thā so us pe luTā.e hue to haiñ

himmat vaale pal meñ badal dete haiñ duniyā ko
sochne vaalā dil to baiThā sochā kartā hai

duniyā ke kuchh na kuchh to talabgār se rahe
ham apnī hī nazar meñ ḳhatā-kār se rahe

jaise bhī ye duniyā hai jo kuchh bhī zamānā hai
sab terī kahānī hai sab merā fasānā hai

tadbīr bhī ye kah kar ruḳhsat huī furqat meñ
taqdīr kī duniyā hai qismat kā zamānā hai

umīd-o-bīm ke mehvar se haT ke dekhte haiñ
zarā sī der ko duniyā se kaT ke dekhte haiñ

aañkh be-qābū hai duniyā kī tarah
dil hai pahlū meñ tamannā kī tarah

mujh ko ma.alūm nahīñ thā ai dost
tū bhī begāna hai duniyā kī tarah

duniyā kahīñ jo bantī hai miTtī zarūr hai
parde ke pīchhe koī na koī zarūr hai

nāgin hī jāniye use duniyā hai jis kā naam
laakh āstīñ meñ pāliye Dastī zarūr hai

jaañ de ke bhī ḳharīdo to duniyā na aa.e haath
ye musht-e-ḳhāk kahne ko sastī zarūr hai

ab khulā raaz ki haiñ ḳhvāb hī duniyā ke sutūn
zalzale aa.e haiñ jab ḳhvāb hamāre TuuTe

rahnā hai kise ḳhvāb sī duniyā meñ hamesha
'kāshif' kisī din lauT ke ghar jā.eñge ham bhī

duniyā meñ hāl-e-āmad-o-raft-e-bashar na pūchh
be-iḳhtiyār aa ke rahā be-ḳhabar gayā

kab kisī kī huī hai ye duniyā
ham abas chaah meñ paḌe hue haiñ

kahāñ kī jannat kidhar kā dozaḳh kidhar kī duniyā kahāñ kā uqbā
ye sab fasāna ye sab kahānī 'sahar' faqat shaiḳh o shabāb kī hai

phailā.e jab daam havas ne rasm-e-mohabbat aam huī
past huā me.aar vafā kā ik duniyā badnām huī

kyā kahiye kis kis kī nazar ne bad-zauqī ko aam kiyā
un kī nazroñ ke hote kyuuñ duniyā ġharq-e-jām huī

masāfat-e-umr meñ ziyāñ kā hisāb hotā hai justujū se
magar maiñ duniyā ko dekhtā huuñ charāġh aur aa.ine kī rū se

kitnī ḳhush-hāl hai saarī duniyā
kitnā vīrān hai ye ghar dekho