Tags-Duniya

sachche logoñ ko ye duniyā jiine hī kab detī hai
un se pūchho jo ye jīvan jiine par majbūr hue

is duniyā meñ kuchh paane kā muul chukānā paḌtā hai
milī hai shohrat jin ko ziyāda vo apnoñ se duur hue

apnā ujālā baañT ke sab ko ḳhud meñ hī kho jaate haiñ
aise log magar ai duniyā tujh ko kab manzūr hue

us meñ rah kar us se bachnā mushkil hai
duniyā nāvak afgan aahū ham donoñ

pukārnā hai tirā kaam kaam kar 'jāved'
palaT ke aa.egī duniyā tirī sadā kī taraf

ham ne is duniyā ke mai-ḳhāne meñ ye dekhā fareb
bas vahī pyāse rahe jo sāhib-e-īmān the

apnī duniyā hai dil-fareb bahut
ek dil ko kahāñ kahāñ rakhnā

merī duniyā muntazir hai aap kī
apnī duniyā chhoḌ kar aa jā.iye

vafā kī raah ko is taur se kiyā raushan
ki yaad aa.egī duniyā ko āshiqī merī

hameñ tere sivā is duniyā meñ kisī aur se kyā lenā-denā
ham sab ko javāb nahīñ dete ham sab se savāl nahīñ karte

ahl-e-duniyā zar-o-gauhar kī tamannā meñ rahe
os paḌtī rahī sūraj kī kiran aatī rahī

hasīn duniyā ujaḌ ga.ī to agar kahīñ ye bigaḌ ga.ī to
gumāñ se aage nikal ga.ī to gumāñ se aage gumān kar lo

kabhī to aanā hai duniyā ke sāmne us ko
ab us ko DhūñDhne dair-o-haram meñ jaanā kyā

jalegā jitnā bhī duniyā ko raushnī degā
charāġh-e-ilm-o-hunar hai ise bujhānā kyā

jiinā mushkil to bahut hai tirī is duniyā meñ
lekin is ḳhvāb ko marnā bhī nahīñ chāhiye hai

ek hī rañg kā ġham-ḳhāna-e-duniyā niklā
ġham-e-jānāñ bhī ġham-e-zīst kā saayā niklā

sham-e-harīm-e-lam-yazalī thā gulū-e-shāh
tārīk shab meñ jaise huvaidā ho nūr-e-māh

mere bāhar utnī hī marbūt hai be-rabtī
mere andar kī duniyā hai jitnī pur-asrār

sun rakkhā hai be-shak ham ne log nahīñ deñge ab jiine
duniyā kar le jo kartī hai pahlī baar mohabbat kī hai

chhoḌ de maar laat duniyā ko
kuchh nahīñ hai sabāt duniyā ko