Tags-Duniya

ye āvāzeñ merī hī paidā-karda haiñ
guuñj rahā huuñ maiñ duniyā ke har dil meñ

kisī goshe meñ duniyā ke makīñ hote hue bhī
vo mere saath rahtā hai nahīñ hote hue bhī

vo pul kahāñ hai jo duniyā se joḌtā thā mujhe
jo tū qarīb ho sab se qarīb aa.uuñ maiñ

jab na jīte-jī mire kaam aa.egī
kyā ye duniyā āqibat baḳhshā.egī

ye duniyā jis ghaḌī guzrī yahāñ se
maiñ tere ḳhvāb meñ khoyā huā thā

kabhī ḳhvāhish-e-duniyā le Duubī kabhī ḳhauf-e-ḳhudā ne tañg kiyā
ab aa kar bhed khulā ham par na thī ye achchhī na thā vo achchhā

hai ik darvāze bin dīvār-e-duniyā
mafar ġham se yahāñ koī nahīñ hai

havā aa.ī hai kis duniyā se ho kar
har ik Tahnī shajar kī kāñptī hai

maiñ har dīpak bujhātā jā rahā huuñ
merī duniyā meñ itnī raushnī hai

duniyā merī balā jaane mahñgī hai yā sastī hai
maut mile to muft na luuñ hastī kī kyā hastī hai

in madh-bharī ā.ankhoñ meñ kyā sehr 'tabassum' thā
nazroñ meñ mohabbat kī duniyā hī simaT aa.ī

jo sañvarne ko kisī taur bhī raazī na huī
bhaaḌ meñ pheñk dī duniyā vo nigoḌī ham ne

mat ho bahār-e-gulshan-e-duniyā kā andalīb
is phūlban meñ bū-e-rifāqat nahīñ rahī

duniyā ke rañg anokhe haiñ
jo mere sāmne rahtā hai us ke ghar meñ ghar-vālī hai

go hama-vaqt na.ī lagtī hai duniyā lekin
shai purānī ho to bosīda sī ho jaatī hai

ḳhudā ko āzmānā chāhtā huuñ
maiñ ye duniyā jalānā chāhtā huuñ

isī sabab se hai duniyā meñ āsmāñ badnām
tum apne haath meñ ye intizām mat lenā

ye duniyā jā-e-āsā.ish nahīñ hai āzmā.ish hai
yahāñ jo saḳhtiyāñ tujh par paḌīñ añgez karnā hai

zamāna dekhā hai ham ne hamārī qadr karo
ham apnī āñkhoñ meñ duniyā basā.e baiThe haiñ

tamām hosh kī duniyā nisār hai us par
tirī galī meñ jise niiñd aa ga.ī hogī