Tags-Duniya

duniyā kī justujū to ham se na ho sakegī
ye minnat aarzū to ham se na ho sakegī

āñkhoñ meñ khaTaktī hī rahī daulat-e-duniyā
har sikke kī machhlī meñ bhī kāñTā nazar aayā

na pūchho kuchh ma.asiyat kā aalam farishto ham kyā ki tum ne bachte
haqīqat is kī unhīñ se pūchho sara-e-duniyā meñ jo rahe haiñ

duniyā to patthar hai patthar kyā jaane
kitne aañsū chīḳh rahe haiñ jharne meñ

yuuñ mirā soz-e-jigar duniyā meñ rusvā ho gayā
sher-o-naġhma rañg-o-nik.hat jām-o-sahbā ho gayā

daf.atan gūñjī sadā phir ālam-e-anvār meñ
aurteñ duniyā kī hāzir hoñ mire darbār meñ

kaun samjhā.e ki duniyā gol hai
aap ne jaisī sunī vaisī kahī

ik zamāna thā ki ik duniyā mire hamrāh thī
aur ab dekhūñ to rasta bhī nigāhoñ meñ nahīñ

jis ne duniyā bhar ke ġham apnā.e the
us ko duniyā ne kahā be-dard thā

isī hujūm meñ laḌ-bhiḌ ke zindagī kar lo
rahā na jā.egā duniyā se duur jā kar bhī

kuchh aisā huā be-sar-o-sāmān mirī jaañ
duniyā mujhe kahne lagī nādān mirī jaañ

ab terī ināyat ho ki duniyā kī navāzish
dil ho to gayā vaise ye vīrān mirī jaañ

jaane maiñ kaun thā logoñ se bharī duniyā meñ
merī tanhā.ī ne shīshe meñ utārā hai mujhe

duniyā se ta.alluq kā sabab kis ko batā.ūñ
ab dost kahāñ dushman-e-jānī ke alāva

jur.at ho to duniyā se baġhāvat kar lo
ehsās ko begāna-e-nafrat kar lo

dikhā kar aa.ine meñ apnā chehra kho ga.e haiñ
ye duniyā bhī tamāshā thī tamāshā ho ga.e haiñ

terī jannat ko tarastī huī terī duniyā
terī duniyā pe qanā.at nahīñ karne detī

duniyā meñ huuñ duniyā kā talabgār nahīñ huuñ
bāzār se guzrā huuñ ḳharīdār nahīñ huuñ

safar duniyā se karnā kyā hai 'tābāñ'
adam hastī se rāh-e-yak-nafas hai

nāhaq shikāyat-e-ġham-e-duniyā kare koī
ġham hai baḌī ḳhushī jo gavārā kare koī