Tags-Duniya

duniyā rakkhe chāhe pheñke ye hai paḌī zambīl-e-suḳhan
ham ne jitnī pūñjī joḌī rattī rattī chhoḌ chale

saarī umr gañvā dī 'qaisar' do gaz miTTī haath lagī
kitnī mahñgī chiiz thī duniyā kitnī sastī chhoḌ chale

ham us ko bhuul baiThe haiñ añdhere ham pe taarī haiñ
magar us ke karam ke silsile duniyā pe jaarī haiñ

hameñ bhī dekh le duniyā kī raunaq dekhne vaale
tirī āñkhoñ meñ jo āñkheñ haiñ vo āñkheñ hamārī haiñ

har ek chiiz kī duniyā meñ had muqarrar hai
magar ye rañj zamāna kā be-hisāb rahā

saare manzar ek jaise
saarī duniyā ek sī

vo kare azm-e-safar to kījiye duniyā se kuuch
ye irāda ham ne bhī dil meñ hai Thahrāyā huā

tirī duniyā meñ jiine se to behtar hai ki mar jaa.eñ
vahī aañsū vahī aaheñ vahī ġham hai jidhar jaa.eñ

ham is duniyā ke musāfir haiñ
aur qāfila hai har aan ravāñ

maqām-e-āshiqī duniyā ne samjhā hī nahīñ varna
jahāñ tak terā ġham hotā vahīñ tak zindagī hotī

kuchh ham ne bhī duniyā ko satāyā hai bahr haal
kuchh apnī tabī.at se bhī halkān rahī hai

yahāñ kahāñ bastiyoñ kī raunaq yahāñ to sannāTā chīḳhtā hai
ujaaḌ sahrā kā ye safar hai diloñ kī duniyā basā.e rahnā

aisā lagtā hai samajhdār hai duniyā saarī
maiñ huuñ is paar to us paar hai duniyā saarī

is na.ī dauḌ meñ aage hai na pīchhe koī
dām-e-ujlat meñ giraftār hai duniyā saarī

dostī aur dikhāve kī mohabbat karnā
sab kā sheva hai adākār hai duniyā saarī

qāfile dil ke sar-e-ām haiñ luuTe jis ne
usī rahzan kī talabgār hai duniyā saarī

aap andāz kuchh apnā to badal lete 'faroġh'
chaliye maanā ki ḳhatāvār hai duniyā saarī

zikr-e-ma.abūd hī taskīn kā sāmāñ hogā
zikr duniyā meñ to rāhat nahīñ milne vaalī

ye duniyā hai use dār-ul-fitan kahnā hī paḌtā hai
yahāñ har rāhbar ko rāhzan kahnā hī paḌtā hai

hil jaatī hai duniyā mirī fariyād se 'hāfiz'
tāsīr ġhazab kī hai mirī āh-e-rasā meñ