Tags-Duniya

ajiib rañg badaltī huī mirī duniyā
ba-zer-e-shām-e-safar nīl-gām hotī huī

taḳhlīq isī se huī naġhmāt kī duniyā
'iqbāl' ko jo ġham tirī ḳhushiyoñ se milā hai

lete haiñ baar baar vo aise ḳhudā kā naam
duniyā meñ jaise aur kisī kā ḳhudā na thā

ishq kā aglā paḌāv maiñ huuñ maiñ duniyā-parast
al-madad ai qais ai farhād yaarī kījiye

miT jā.egā sehr tumhārī āñkhoñ kā
apne paas bulā legī duniyā ik din

'parvīñ' ġhalat hai un ko samajhnā judā judā
haiñ jism-o-jāñ kī tarah se duniyā-o-dīñ sharīk

tujh meñ kas-bal hai to duniyā ko bahā kar le jā
chaa.e kī pyālī meñ tūfān uThātā kyā hai

farishta har bashar ko har zamīñ ko āsmāñ samjhe
ki ham to ishq meñ duniyā ko hī jannat-nishāñ samjhe

paanī se huvaidā hotī hai duniyā meñ ḳhudā kī rahmat bhī
paanī meñ dikhā.ī detī hai tasvīr-e-azāb-o-la.anat bhī

kisī aur se kareñ kyuuñ gila hameñ apne-āp se dukh milā
vo jo dard-e-dil se ho āshnā use duniyā-bhar kā vabāl kyā

aḳhlāq se ho ga.ī aarī duniyā
sar-tā-ba-qadam hai kārobārī duniyā

banā banā ke jo duniyā miTā.ī jaatī hai
zarūr koī kamī hai ki paa.ī jaatī hai

rafta rafta miT jā.eñge naqsh hamārī hastī ke
dhīre dhīre ho jā.eñge duniyā meñ afsāna ham

duniyā se uThe marīz-e-furqat
ai dār-e-masīh tū asā ho

terā itihās hai ḳhuuñ meñ luthḌā huā
tū abhī tak hai duniyā meñ bichhḌā huā

itnā sochā tujhe ki duniyā ko
ham ne terī nigāh se dekhā

isī ummīd pe duniyā ko ham ne chhoḌ diyā
sukūn dil ko milegā tirī panāhoñ meñ

lazzat-e-zaḳhm se āgāh nahīñ thī duniyā
silsila gul se chalā hai jigar-afgārī kā

haath na aa.ī duniyā bhī aur ishq meñ bhī gumnām rahe
soch ke ab sharminda haiñ kyuuñ donoñ meñ nākām rahe

jaane kyā kah rahī hai duniyā ab
pahle kahtī thī kyuuñ na mar jā.ūñ