Tags-Duniya

ishq kī bad-duā lagī hai tumheñ
baiThe duniyā kamāo jo bhī hai

ho ga.ī shaam tab milī duniyā
saarā din DhūñDe phire the ham

hameñ āḳhirat meñ 'āmir' vahī umr kaam aa.ī
jise kah rahī thī duniyā ġham-e-ishq meñ gañvā dī

us ko ma.alūm haiñ duniyā kī misāleñ lekin
ishq ke sahrā meñ jo dil kā hiran hai kyuuñ hai

tumheñ fursat ho duniyā se to ham se aa ke milnā
hamāre paas fursat ke sivā kyā rah gayā hai

kahāñ le jaa.eñ ai dil ham tirī vus.at-pasandī
ki ab duniyā meñ vus.at ke sivā kyā rah gayā hai

haiñ pīrī-o-tiflī-o-javānī ke maze aur
duniyā sā koī aur jahāñ ho nahīñ saktā

mohabbat kā agar bevpār na karte to kyā karte
hai duniyā husn kā bāzār na karte to kyā karte

dikhāve kī ye duniyā hai dikhāvā karnā paḌtā hai
hasīnān-e-jahāñ siñgār na karte to kyā karte

lā ke duniyā meñ hameñ zahr-e-fanā dete haiñ
haa.e is bhūl-bhulayyāñ meñ daġhā dete haiñ

mil kar bhī ham to mil nahīñ paa.e kisī tarah
duniyā kā zulm ham pe javāñ is qadar huā

ḳhudā ḳhāmosh hai!
tum aao to taḳhlīq ho duniyā

rah ga.e nā-murād duniyā meñ
kitne sar iftiḳhār ko dekhā

merī nigāhoñ meñ duniyā kī har shai se nāyāb hai tū
aur kisī ko kyuuñ chāhūñ tujh se behtar jab kuchh bhī nahīñ

maiñ bhī faanī tū bhī faanī saarā aalam faanī hai
kyā ḳhad-o-ḳhāl pe naaz kareñ duniyā meñ amar jab kuchh nahīñ

fasād-e-duniyā miTā chuke haiñ husūl-e-hastī miTā chuke haiñ
ḳhudā.ī apne meñ pā chuke haiñ mujhe gale ye lagā chuke haiñ

hech duniyā hai zar-o-māl hai sab hech magar
ik mohabbat tirī 'mardāñ' hai ye daulat merī

mahv-e-nazzāra zamāna hai magar hāsil-e-dīd
aisā āsāñ nahīñ duniyā kā nazārā karnā

kuchh aap kā ġham kuchh ġham-e-jāñ kuchh ġham-e-duniyā
dāman meñ mire phuul bhī haiñ ḳhaar bhī ḳhas bhī

ham ne maanā hameñ barbād karegī duniyā
kar ke barbād magar yaad karegī duniyā