Tags-Duniya

is niilī dhund meñ kitne bujhte zamāne raakh bikher ga.e
ik pal kī palak par duniyā hai kyā jiinā hai kyā marnā hai

hai aah dard-o-soz kī duniyā liye hue
tūfān-e-ashk-e-ḳhūn hai girya liye hue

ishq-e-junūñ-navāz rahā bazm-e-nāz meñ
ik iztirāb-o-shauq kī duniyā liye hue

vo bachcha kho gayā duniyā kī bhiiḌ meñ kab kā
hasīn ḳhvāboñ kī jo titliyāñ pakaḌtā thā

pahle se marāsim na sahī phir bhī kabhī to
rasm-o-rah-e-duniyā hī nibhāne ke liye aa

hazār chāheñ na chūTegī ham se ye duniyā
yahīñ raheñge mohabbat kī be-kasī ke liye

phir kho na jaa.eñ ham kahīñ duniyā kī bhiiḌ meñ
miltī hai paas aane kī mohlat kabhī kabhī

ahl-e-dil zinda haiñ kis ummīd par
nazm-e-duniyā hai nizām-e-ārzū

koī hamdam banā ke dekho tum
dil kī duniyā basā ke dekho tum

achchhā hai tū ne in dinoñ dekhā nahīñ mujhe
duniyā ne tere kaam kā chhoḌā nahīñ mujhe

barbat-e-dil ke mire naġhme nahīñ sho.ale haiñ ye
garmī-e-ehsās se duniyā ko garmātā huuñ maiñ

nayā libās pahan kar bhī
duniyā vahī purānī hai

ek tum hī nahīñ duniyā meñ jafākār bahut
dil salāmat hai to dil ke liye āzār bahut

likhī haiñ chehroñ pe jo surḳhiyāñ paḌho un ko
ḳhabar ho aam ki duniyā se bā-ḳhabar ham haiñ

maiñ bhī uljhā huuñ manzar ke nairañg se
mere pairoñ se lipTī hai duniyā bahut

hijr ke ġham meñ rone vaale terā alam duniyā kī nazar meñ
kal bhī ibrat-nāk nahīñ thā aaj bhī ibrat-nāk nahīñ hai

hameñ itnī baḌī duniyā kā pata thoḌī thā
jahāñ ham tum huā karte the vahāñ rah ga.e ham

māl-e-duniyā talāsh karnā hai
ya.anī rutba talāsh karnā hai

to kuñvārī hai kab se ai duniyā
terā rishta talāsh karnā hai

'abr' duniyā ko chhoḌ jaane kā
ik bahāna talāsh karnā hai