Tags-Duniya

jab use zulm-o-sitam hī meñ maza aatā hai
kisī nāshād ko kyā shaad karegī duniyā

dekhnā ye hai ki ham ahl-e-junūñ par kab tak
nit na.e tarz kī bedād karegī duniyā

aaj tū apnī karāmāt pe itrātī hai
kal magar aap hī fariyād karegī duniyā

dushmanī hai use arbāb-e-vafā se lekin
ye na hoñge to inheñ yaad karegī duniyā

nahīñ ma.alūm yūñhī ḳhud ko kahāñ tak 'manshā'
qaid-e-aḳhlāq se āzād karegī duniyā

har ik luġhat se māvarā maiñ huuñ ajab muhāvara
mirī zabāñ meñ paḌh mujhe duniyā kā tarjuma na maan

terī duniyā meñ tire husn kā shaidā.ī huuñ
ai ḳhudā mujh ko gunahgār na samjhā jaa.e

ye sach hai ki duniyā kī ravish Thiik nahīñ hai
kuchh ham bhī to duniyā ko gavārā nahīñ karte

duniyā ke jhamele hī kuchh aise haiñ ki un ko
ham bhuul to jaate haiñ bhulāyā nahīñ karte

pindār-e-sard-mehrī-e-duniyā kī ḳhair ho
dil ne agarche kar liyā shāmil duā meñ chup

'āfāq' duniyā kyā hai qayāmat ke ba.ad bhī
zinda rahegī hulla-e-ahl-e-ridā meñ chup

aage baḌhā.iye to qadam aap 'ja.afarī'
duniyā ab aisī vādī-e-pur-ḳhār bhī nahīñ

unheñ duniyā ab ashk-e-ġham kahe yā ḳhuun kī būñdeñ
mohabbat ne charāġh āñkhoñ meñ lā kar rakh diye dil se

ham aise kaun the lekin qafas kī ye duniyā
ki par-shikastoñ meñ apnī misāl se bhī ga.e

kiyā hai munkir-o-sarkash ko bhī sairāb duniyā meñ
tire abr-e-karam ne kis ko tishna-kām dekhā hai

phir dekh ki ye duniyā kaisī nazar aatī hai
'mushtāq' mai-e-ġham meñ thoḌā sā milā paanī

saarī tashbīhāt dafnā deñ bayābāñ meñ kahīñ
terā kyā duniyā meñ koī bhī kisī jaisā nahīñ

kaun sā lutf na firdaus meñ paayā lekin
phir bhī duniyā ke mire dil se bhulā.e na ga.e

is darja hue ham duniyā se bezār ki zikr-e-ġhair to kyā
ab ḳhud se gurezāñ haiñ aur apne saa.e se ghabrāte haiñ

duniyā hī se gayā maiñ jūñhī naaz se kahā
ab bhī gumān-e-bad na ga.e tere yā ga.e