Tags-Duniya

bhāgtī-dauḌtī duniyā meñ kise fursat hai
jamtī jaatī hai yahāñ miir ke dīvān meñ ḳhaak

hameñ ye ta.ane na do ki ham ne zamāna-sāzī ke gur na sīkhe
ki rafta rafta mizāj-e-duniyā hamāre sāñche meñ Dhal rahā hai

'nushūr' āḳhir kahāñ tak fikr-e-duniyā dil dukhā.egī
ġham-e-hastī ko zauq-e-sher kartā jā rahā huuñ maiñ

mujhe ḳhabar hai ki duniyā badal nahīñ saktī
isī liye to maiñ chashma badal ke aayā huuñ

duniyā se alaihadgī kā rāsta
duniyā se nibāh kar ke dekhā

ham ne dekhā hī thā duniyā ko abhī us ke baġhair
lījiye biich meñ phir dīda-e-tar aa ga.e haiñ

aap kī raah meñ duniyā nazar aatī hai mujhe
ik qadam aur jo baḌh jā.ūñ to duniyā bhī nahīñ

aap kyā soch ke ġham apnā atā karte haiñ
himmat-e-dil to ba-qadr-e-ġham-e-duniyā bhī nahīñ

tū hai vo fātah-e-ālam ki ek duniyā ne
shikast khā ke sarāhī hī himmateñ terī

phir se ḳhudā banā.egā koī nayā jahāñ
duniyā ko yuuñ miTā.egī ikkīsvīñ sadī

falak ke daur se duniyā badal ga.ī varna
jahāñ bane haiñ ye mai-ḳhāne ḳhān-qāheñ thiiñ

itnī baḌī duniyā meñ kab se maiñ akelā huuñ
ai rabb-e-karīm apne bandoñ se milā mujh ko

maiñ kyā jānūñ kyā hai duniyā
insānoñ kī bastī hai yā ek sarā-e-fānī hai

ḳhvāb qissa chāhateñ duniyā siyānī le ga.ī
aur jo baaqī thā terī lan-tarānī le ga.ī

ishq kī duniyā meñ kyā kyā ham ko sauġhāteñ milīñ
suunī sub.heñ rotī shāmeñ jāgtī rāteñ milīñ

kis lahje kin lafzoñ meñ shahkār-e-azal kī baat karūñ
duniyā bhar ke fan-pāroñ se ḳhaak kā paikar achchhā thā

dhokā hai tamām bahr duniyā
dekhegā ki hoñT tar na hogā

duniyā kī na kar tū ḳhvāst-gārī
us se kabhū bahra-var na hogā

bharī duniyā meñ jī nahīñ lagtā
jaane kis chiiz kī kamī hai abhī

jinheñ aatā ho fan auroñ ke ġham apnā.e jaane kā
unheñ tā-zindagī duniyā meñ koī ġham nahīñ hotā