Tags-Duniya

aur le aa.e ho tum bāteñ ye duniyā bhar kī
apnī bātoñ se yahāñ pahle hī be-zārī hai

kyuuñ ishq ke jhagḌe ko le jaatā hai uqbā meñ
kar ḳhātma duniyā meñ duniyā kī musībat kā

hoñT khuleñ to nikle vaah
duniyā ek tamāshā-gāh

zahe-nasīb ki duniyā ne tere ġham ne mujhe
masarratoñ kā talabgār kar ke chhoḌ diyā

khulā ki vo bhī terī talab kā ik benām tasalsul thā
duniyā se jo bhī ham ne hālāt ke zer-e-asar māñgā

kahā kis ne musalsal kaam karne ke liye hai
ye duniyā asl meñ ārām karne ke liye hai

ye kār-e-ishq meñ uljhī huī be-nām duniyā
haqīqat meñ numūd o naam karne ke liye hai

ġhamoñ kī duniyā ko rauñd Dāleñ nashāt-e-dil pā.emāl kar leñ
na.ī mohabbat nayā junūñ hai ḳhudāyā kyā apnā haal kar leñ

ek duniyā ne tujhe dekhā hai lekin maiñ ne
jaise dekhā hai tujhe vaise na dekhā hotā

manzil mile na koī bhī rasta dikhā.ī de
duniyā faqat ye khel tamāsha dikhā.ī de

mujh ko miTā de is tarah duniyā se ai ḳhudā
tārīḳh meñ bhī koī na mujh sā dikhā.ī de

'hasrat' na agar us kā qad o zulf banāte
duniyā meñ kahīñ fitna-o-āshob na hotā

tirī duniyā ko ai vaa.iz mirī duniyā se kyā nisbat
tirī duniyā meñ taqdīreñ merī duniyā meñ tadbīreñ

yaar ab tak na milā chhor hameñ duniyā kā
roz-e-avval hī se raftār sambhāle hue haiñ

samajh rahe the ki apnī sudhar ga.ī duniyā
hameñ to muft meñ badnām kar ga.ī duniyā

mutālboñ se nahīñ mil sakī najāt kabhī
havas ke zinda taqāzoñ se bhar ga.ī duniyā

har ek aañkh meñ chaḌhtā huā anā kā nasha
har ek harf-e-vafā se mukar ga.ī duniyā

asiir kar ke tabāhī ke mujh ko daldal meñ
batā.e kaun ye mujh ko kidhar ga.ī duniyā

vo kyā hue mire pur-kaif pur-sukūñ lamhe
mujhe talāsh hai jis kī kidhar ga.ī duniyā

kaTī huī hai har ik shāḳh peḌ se 'mohsin'
lo barg-e-ḳhushk sī ab ke bikhar ga.ī duniyā