Tags-Duniya

qadam qadam pe jinheñ justujū ho chāhat kī
unheñ rafīq na duniyā banā sakegī kabhī

shu.ūr-o-hosh kī duniyā hai ek muddat se
nazar nazar meñ na.ī raushnī ke ḳhvāb liye

taḳh.īl meñ jab utrī
duniyā ke masā.il ne

ek taraf tire husn kī hairat ek taraf duniyā
aur duniyā meñ der talak Thahrā nahīñ jā saktā

kyuuñ mahv-e-sar-e-pindār huā ai musht-e-ḳhāk hai naqsh-e-fanā
duniyā meñ kahāñ hai rañg-e-baqā jamshed nahīñ maġhfūr nahīñ

duniyā-bhar se duur ye nagrī
nagrī duniyā-bhar se nirālī

ye to ik duniyā ko chāheñ
in ko kis ne apnā jaanā

mujh ko samjhā.e to koī rāzdār-e-kā.enāt
mujh meñ hai ābād ye duniyā ki ḳhud apnā huuñ maiñ

an-ginat logoñ ne duniyā meñ mohabbat kī hai
kaun kahtā hai ki sādiq na the jazbe un ke

dekhne vaale ye kis shaan se dekhā mujh ko
aaj duniyā ke maze de ga.ī duniyā mujh ko

jazb-e-dil tere karishmoñ ne ulaT dī duniyā
ab sunāte haiñ vo ḳhud merā fasānā mujh ko

kabhī taqdīr kā mātam kabhī duniyā kā gila
manzil-e-ishq meñ har gaam pe ronā aayā

ulfat kā dard-e-ġham kā parastār kaun hai
duniyā meñ āñsuoñ kā talabgār kaun hai

phir tasavvur meñ koī aane lagā hai bār-bār
phir mirī ummīd kī duniyā javāñ hone lagī

apnī aahaT pe chauñktā huuñ maiñ
kis kī duniyā meñ aa gayā huuñ maiñ

isī liye to nahīñ mo'tabar zamāne meñ
ki rañg-e-sūrat-e-duniyā nahīñ badalte ham

tire āzād bandoñ kī na ye duniyā na vo duniyā
yahāñ marne kī pābandī vahāñ jiine kī pābandī

ye husn-o-latāfat ye ḳhushbū ye rañg-e-fazā ye josh-e-numū
aalam hai anokhā kaliyoñ kā duniyā hai nirālī phūloñ kī

ġham-e-duniyā nahīñ phir kaun sā ġham hai ham ko
fikr-o-andesha-e-uqbā se bhī ram hai ham ko

badaltī jaatī hai duniyā kuchh is tarah 'ḳhālid'
ki jo nazar meñ hai samjho nazar kā dhokā hai