Tags-Duniya

na jaane kyā milā kyā hasrateñ baaqī rahīñ dil meñ
abhī duniyā se kyā kuchh aur lenā hai

mujhe chhoḌā hai taptī dhuup meñ jis shaḳhs ne tanhā
use bhī ġham kī duniyā meñ akelā likh diyā jaa.e

qābil-e-izzat haiñ is duniyā ke mehnat-kash avaam
mulk kī daulat haiñ ye, vājib hai in kā ehtirām

ḳhāndānī rishtoñ meñ aksar raqābat hai bahut
ghar se niklo to ye duniyā ḳhūbsūrat hai bahut

ham se ho saktī nahīñ duniyā kī duniyā-dāriyāñ
ishq kī dīvār ke saa.e meñ rāhat hai bahut

ye duniyā maqtaloñ se kam kahāñ hai
sabhī ke qatl se nāshād huuñ maiñ

yuuñ bhī koī duniyā kī nigāhoñ se na gir jaa.e
'mullā' ko burā kahne meñ Dar kuchh bhī nahīñ kyā

suunī suunī sī hai har mahfil-e-īzā-e-talabī
jaise duniyā meñ koī ġham na rahā mere ba.ad

maiñ jāntā thā ki duniyā jo hai vo hai hī nahīñ
so ḳhud ko ḳhvāhish-e-duniyā se māvarā rakkhā

qafas kī tārīk ḳhalvatoñ par haiñ mo'tariz kyuuñ ye ahl-e-duniyā
chaman meñ bhī āshiyāñ jaleñge to phir kahīñ raushnī milegī

hasrat-e-āb-o-gil dobāra nahīñ
dekh duniyā nahīñ hamesha nahīñ

duniyā use pūjegī ba-sad husn-e-aqīdat
maiñ apnī shabāhat ko jo patthar se nikālūñ

hassās ho duniyā to jo nashtar se hai maḳhsūs
vo kaam bhī maiñ barg-e-gul-e-tar se nikālūñ

tire gītoñ kī jhankāroñ se duniyā guuñj to uTThī
magar kāshī kī nagrī meñ baḌā gumnām hai 'sūfī'

mirī raftār duniyā se bahut hī tez hotī hai
ragoñ meñ ḳhuun kī aksar ravānī bhuul jaatā huuñ

har chiiz ajnabī sī hai har shaḳhs ġhair hai
duniyā badal ga.ī nigah-e-mehrbāñ ke saath

'shārib' ye jāntā huuñ ki duniyā hai bevafā
chalnā paḌegā phir bhī isī kārvāñ ke saath

din bhar dhuup kī tarah se ham chhā.e rahte haiñ duniyā par
raat huī to simaT ke aa jaate haiñ dil kī guphāoñ meñ

qārūñ uThā ke sar pe sunā ganj le chalā
duniyā se kyā baḳhīl ba-juz rañj le chalā

duniyā bhar kī ḳhaak koī chhāntā phirtā hai ab
aap ne dar se uThā kar kaisā rusvā kar diyā