Tags-Duniya

roz māmūra-e-duniyā meñ ḳharābī hai 'zafar'
aisī bastī ko to vīrāna banāyā hotā

is duniyā se us duniyā tak rusvā kar dene ke ba.ad
ab logoñ kā kyā kahnā hai sāhab jī kuchh to bolo

vasl hotā hai jin ko duniyā meñ
yārab aise bhī log hote haiñ

bahut ham se gurezāñ ye zamīn o āsmāñ haiñ
ijāzat ho to ik duniyā na.ī ābād kar duuñ

nazar vo log ujāle meñ ḳhud na aa.e kabhī
bulā rahe haiñ jo duniyā ko raushnī kī taraf

terī nazroñ meñ thī duniyā to yahī kyā kam thā
hashr ye hai ki tū duniyā kī nazar meñ aa.ī

duniyā jis kī khoj meñ pāgal phirtī hai
ham to us ke darshan karte rahte haiñ

jise darvāza kahte the vahī dīvār niklī
jise ham dil samajhte the vo duniyā ho rahā hai

ye terā merā jhagḌā hai duniyā ko biich meñ kyuuñ Dāleñ
ghar ke andar kī bātoñ par ġhairoñ ko gavāh nahīñ karte

hai āqibat ḳharāb to duniyā hī Thiik ho
koī to sūrat-e-guzar-auqāt chāhiye

jab qais kī kahānī ab anjum kī dāstāñ
duniyā ko dil lagī ke liye baat chāhiye

kyuuñ aa ga.ī darmiyān duniyā
ye terā mirā mo.āmla hai

bahut hasīñ thī kabhī ye duniyā mire mutābiq
magar rahā ab na us kā chehra mire mutābiq

jiye garche isī duniyā meñ ham bhī
magar duniyā hamārī aur hī thī

baḌe logoñ se miltā hai bahut mash.hūr duniyā meñ
vo aisā shaḳhs ki ilzām bhī us par nahīñ aatā

dil se duniyā tak ik aisā hī safar thā jis meñ
kahīñ dil aur kahīñ duniyā-e-hasīñ chhūT ga.ī

uljhī uljhī saañs ghabrā.ī nazar bahke qadam
ai nigār-e-mast duniyā dūsrī hone lagī

chāñd merā kahkashāñ merī gul-o-ġhuncha mire
tum mire hone lage duniyā mirī hone lagī

soz-e-dil se raushnī hone lagī dil meñ 'nazīr'
ishq kī duniyā bhī duniyā husn kī hone lagī

bahār aa.ī har ik zarre se phūTī husn kī duniyā
fareb-e-mā-sivā ke haq-numā hone kā vaqt aayā