Tags-Duniya

mere ḳhvāb zaḳhmī hue
to duniyā ke saare zābte jhūTe lage

vahshateñ kaisī haiñ ḳhvāboñ se ulajhtā kyā hai
ek duniyā hai akelī tū hī tanhā kyā hai

baḌī rañgīn behad ḳhushnumā thī
tirī duniyā meñ lekin jī lagā kam

'hasan' duniyā meñ ham ne yuuñ basar kī
adāvat kam shikāyat kam gila kam

na maiñ apnā na maiñ terā huuñ duniyā
to phir jiine kī hasrat kis liye hai

mirā ā.īna hai jab terā chehra
to phir duniyā kī hairat kis liye hai

hai duniyā kā javāz is amr hī meñ
jahannam kyuuñ hai jannat kis liye hai

hañste haiñ dahān-e-zaḳhm se ham gaate haiñ fuġhāñ ke barbat par
āshufta-saroñ kī duniyā ke sab Dhañg nirāle hote haiñ

dekhā na tujhe ai rab ham ne haañ duniyā terī dekhī hai
saḌkoñ par bhūke bachche bhī koThe par abla naarī bhī

hameñ āḳhirat meñ 'āmir' vahī umr kaam aa.ī
jise kah rahī thī duniyā ġham-e-ishq meñ gañvā dī

khaḌā huuñ maiñ das hazār saala qadīm duniyā ke biich 'ovaisī'
ulaT ke tārīḳh ke varaq zindagī mujhe kuchh sunā rahī hai

jīte-jī kī anjuman hai jīte-jī kā soz-o-sāz
ho ga.iiñ jis vaqt band āñkheñ na phir duniyā na ham

duniyā ke masā.ib jhelne ko mālik ne banāyā hai jīvan
ārām bhalā phir kaahe kā phir kaahe ye sonā hai

kaise duniyā kā jā.eza kiyā jaa.e
dhyān tujh se agar haTā liyā jaa.e

gardish meñ zamāna hai har pal ummīd pe duniyā hai qaa.em
kal jin se the sahme sahme se ham, haiñ aaj vo larzāñ larzāñ bhī

insāñ kā samajhnā hai bāqī, anjām ko pahuñche hai duniyā
ban jaa.e farishta jab chāhe ho jaa.e ye akasr haivāñ bhī

ārām sarakne vaalā hai kis shai pe ye ġharra hai tujh ko
duniyā ye badalne vaalī hai kis chiiz pe tū itrātā hai

andāz-o-adā se ai duniyā tū laakh sañvar kar sāmne aa
ye 'josh' faqīr āzād-manash jab dhyān meñ tujh ko laatā hai

dil se kahtā hai ġham-e-ulfat-e-jānāñ dam-e-marg
tum to duniyā se chale maiñ rahūñ kis kā ho kar

mil jaa.e amaañ duniyā meñ pal bhar nahīñ lagtā
pā jaa.eñ sukūñ dā.imī mar kar nahīñ lagtā