Tags-Duniya

ḳhirad-āmoz hastī hai magar ab kyā kahūñ vo bhī
ki ban jaatī hai dīvānoñ kī duniyā meñ junūñ vo bhī

to kyuuñ satātī hai bigḌe dinoñ kī yaad ki ham
musālahat huī duniyā se ab sudhar ga.e haiñ

khulī jo aañkh to mahshar kā shor barpā thā
maiñ ḳhush huā ki chalo aaj mar ga.ī duniyā

bas ek vaar meñ duniyā ne kar diye TukḌe
mirī tarah se mirā ishq bhī nihattā thā

yahāñ ham ne kisī se dil lagāyā hī nahīñ 'manzar'
ki is duniyā se āḳhir ek din be-zār honā thā

likhā to hai mirī be-ḳhvāb sī in āñkhoñ meñ
maiñ apne-āp ko duniyā se rā.egāñ le jā.ūñ

kuchh nahīñ achchhā to duniyā meñ burā bhī kuchh nahīñ
kījiye sab kuchh magar apnī zarūrat dekh kar

ajnabī kis ḳhvāb kī duniyā se aa.e ho
thake lagte ho

aaj jahāñ kī tārīkī se duniyā bach kar chaltī hai
ham ne us vīrān mahal meñ lākhoñ diip jalā.e the

har ik shai ishtihārī ho ga.ī hai
ye duniyā kārobārī ho ga.ī hai

jitne duniyā meñ sitam chāhe tū kar le mujh par
hashr meñ haath mirā terā garebāñ hogā

yahīñ bastī thī ai hamdam mire rūmān kī bastī
mire afsānoñ kī duniyā mire vijdān kī bastī

havas kī duniyā meñ rahne vāloñ ko maiñ mohabbat sikhā rahā huuñ
jahāñ pe dāman bichhe hue haiñ vahāñ par āñkheñ bichhā rahā huuñ

ilāhī duniyā meñ aur kuchh din abhī qayāmat na aane paa.e
tire banā.e hue bashar ko abhī maiñ insāñ banā rahā huuñ

hazār jaal liye ghūmtī phire duniyā
tire asiir kisī ke huā nahīñ karte

merī duniyā isī duniyā meñ kahīñ rahtī hai
varna ye duniyā kahāñ husn-e-talab thī merā

ham bhī ḳhuub hañse duniyā kī hālat par
duniyā ne bhī ḳhuub sazā dī shahzādī

duniyā tamām ātishīñ-dhāroñ kī zad meñ thī
lekin maiñ be-ḳhatar thā ki vo mere sañg thā

ḳhayāl-o-ḳhvāb kī duniyā se istifāda kiyā
hunar samajh ke isī kaam ko ziyāda kiyā

mai-kash-e-āvāra is duniyā se kyā uTh kar gayā
mai ga.ī jām-o-subū sāqī-o-mai-ḳhane ga.e