Tags-Duniya

vahdat o kasrat ke jalve ḳhilqat-e-insāñ meñ dekh
ek zarra is qadar phailā ki duniyā ho gayā

ik taaza taġhayyur hai tahzīb kī duniyā meñ
yā husn-e-haqīqī ko andāz-e-ḳhirām aayā

kisī taraf jinheñ rāh-e-gunāh mil na sakī
kuchh aise log bhī duniyā meñ nek-nām hue

merī vahshat kā lahū chaaT chukī hai duniyā
ab tamāshā-e-ḳhirad sūrat-e-āzār lage

tirī nigāh-e-karam se ajab nahīñ vāris
'riyāz' sā sag-e-duniyā bhī aadmī ho jaa.e

husūl-e-manzil-e-duniyā kuchh aisā kaam na thā
magar jo raah meñ patthar anā ke rakkhe the

hameñ kahtī hai duniyā zaḳhm-e-dil zaḳhm-e-jigar vaale
zarā tum bhī to dekho ham ko tum bhī ho nazar vaale

tamāshā dekh kar duniyā kā 'sā.el' ko huī hairat
ki takte rah ga.e bad-gauharoñ kā muñh guhar vaale

rūhoñ par mal kar duniyā ke sannāTe
āvāzoñ ke baab meñ rahnā paḌtā hai

ḳhudā kī yaad meñ mahviyat-e-dil bādshāhī hai
magar āsāñ nahīñ hai saarī duniyā ko bhulā denā

apnī pahnā.ī meñ gum-karda nishāñ huuñ maiñ bhī
tū agar hai isī duniyā kā ḳhudā maiñ kyā huuñ

tamām koh kashākash thā mere sar pe 'ḳhayāl'
agarche aur bhī duniyā meñ saḳht jaañ guzre

rabb-e-ālam hai faqat ek sahārā terā
varna duniyā meñ to be-yār-o-madadgār haiñ ham

kyūñ-kar na rahe ġham-e-nihānī terā
duniyā meñ batā kaun hai saanī terā

terā itihās hai ḳhuuñ meñ luthḌā huā
tū abhī tak hai duniyā meñ bichhḌā huā

tere dar par umr kaTī hai phir bhī kyā anjān rahā huuñ
duniyā bhar ke sajdoñ meñ apne sajde pahchān rahā huuñ

parda uThā ki hosh kī duniyā badal ga.ī
hairān huuñ ki sāmne kyā dekhtā huuñ maiñ

ajab duniyā hai is ko fikr-e-duniyā hī nahīñ hai
faqat dekhā hai to girya-kunāñ paanī hī paanī

tujhe kho kar kisī se pyaar honā chāhiye thā
hameñ itnā to duniyā-dār honā chāhiye thā

āsūda huuñ maiñ apne vīrāna-e-hastī meñ
duniyā tujhe milne ke imkān se bāhar huuñ