Tags-Duniya

duniyā se kuuch karnā hai ik roz rahravo
bāñg-e-jaras se shor yahī kārvāñ meñ hai

hamāre baare meñ kyā kyā na kuchh kahā hogā
chaleñge saath to duniyā kā sāmnā hogā

jaur aur zulm se duniyā meñ ye ḳhūbāñ kā ism
bevafā.ī kā mulaqqab na huā thā so huā

ek sach ye hai jo duniyā ko baratne pe khulā
ek sach vo jo kitāboñ meñ likhā dekhtā huuñ

bahut qarīb se ho kar guzar ga.ī duniyā
bahut qarīb se dekhā hai ye tamāshā bhī

vo din bhī the ki tirī ḳhvāb-gīñ nigāhoñ se
pukārtī thī mujhe zindagī bhī duniyā bhī

qafas ke paar kī duniyā kā husn khilne lagā
rihā hue to rihā.ī samajh meñ aane lagī

ik maiñ hī nahīñ huuñ tum jis ko jhūTā kah kar bach jāoge
duniyā tumheñ qātil kahtī hai kis ko kis ko jhuTlāoge

phir chain na pāoge 'aḳhtar' is dard kī maarī duniyā meñ
is dar se agar uTh jāoge dar, dar kī Thokar khāoge

bad-gumānī se huā apne parā.e kā gumāñ
varna apnā thā na duniyā meñ koī begāna thā

mun.im ye kār-ḳhāne haiñ duniyā ke kar na fikr
koī hai jhoñpaḌe meñ to koī mahal meñ hai

'qaisar' hameñ duniyā ne samajh kar bhī na samjhā
uljhe hī rahe kākul-e-urdu kī tarah ham

kyuuñ merī mohabbat se barham ho zamīñ vaalo
ik aur gunah rakh lo duniyā ke gunāhoñ meñ

kaifiyat-e-mai dil kā darmāñ na huī lekin
rañgīñ to rahī duniyā kuchh der nigāhoñ meñ

ham jaise sāda-lauh ko duniyā ke haath se
aisī sazā milī hai ki chālāk ho ga.e

maiñ dekhūñ kab talak manzar suhāne sab purāne
vahī duniyā vahī dil kā jhamelā maiñ akelā

duniyā meñ agar DhūñDiye to kyā nahīñ miltā
sab milte haiñ ik chāhne vaalā nahīñ miltā

dil koī milātā nahīñ TuuTe hue dil se
duniyā meñ hameñ joḌ hamārā nahīñ miltā

jo baat hai duniyā se nirālī hai na.ī hai
andāz kisī meñ bhī tumhārā nahīñ miltā

badal ke duniyā ne bhes sad.hā ise Darāyā use lubhāyā
kabhī zan-e-pīr-zāl ban kar kabhī but-e-shoḳh-o-shañg ho kar