Tags-Duniya

jis kī teġh hai duniyā us kī jis kī lāThī us kī bhaiñs
sab qātil haiñ sab maqtūl haiñ sab mazlūm haiñ zālim sab

duniyā pe apne ilm kī parchhā.iyāñ na Daal
ai raushnī-farosh añdherā na kar abhī

nahīñ ma.alūm kyā kyā rañg badlegī abhī duniyā
nigāh-e-vaqt ke ai dil bahut nāzuk ishāre haiñ

kitnī hairān hai duniyā ki muqaddar kī nahīñ
apnī tadbīr ke hāthoñ huuñ banā.ī huī maiñ

jiyo duniyā bhī kaam hai lekin
'ābrū' bin koī karantā nahiñ

ḳhūbiyoñ meñ nahīñ kuchh daulat-o-zar kī ḳhūbī
ādamiyat se hai duniyā meñ bashar kī ḳhūbī

duniyā pe musallat hai auhām kī tārīkī
ham haiñ ki jalā.e haiñ ik sham-e-yaqīñ tanhā

dil kī duniyā hai musībat se bharī rahtī hai
phir bhī har shāḳh tamannā kī harī rahtī hai

hai qānūn-e-fitrat koī kyā karegā
jo hotā hai duniyā meñ ho kar rahegā

kaisī jannat ke talabgār haiñ tū jāntā hai
terī likkhī huī duniyā ko miTāte hue ham

phir zarā jhalkī dikhā kar ik zarā chhup jā.iye
dil ke har zarre meñ ābād ek duniyā kījiye

churā laayā thā āñkhoñ meñ jo ik tasvīr duniyā kī
vo ab sahrā meñ ik sahme hue bachche kī sūrat hai

ye kis ġham se aqīdat ho ga.ī hai
ġham-e-duniyā se fursat ho ga.ī hai

'jāñbāz' ġhair ke liye duniyā kī ne.amateñ
mere liye hai daar muqaddar kī baat hai

purānī fikr pe qaa.em hai ye na.ī duniyā
ham us ko roz hī paḌhte haiñ bhuul jaate haiñ

ek duniyā ko hai luT jaane kā Dar
ek ham haiñ luT ga.e yāroñ ke biich

ham qarya qarya mulkoñ mulkoñ phirte haiñ
duniyā meñ koī des nahīñ banjāroñ kā

na māya-e-duniyā hai na kuchh diin kā asbāb
mujh be-sar-o-pā kā sar-o-sāmān vahī hai

kyā mirī āñkhoñ se duniyā ḳhud ko dekhegī kabhī
kyā kabhī merī tarah ik roz sochā jā.egā

sher kī duniyā se maiñ bāhar niklūñ bhī to kyuuñ niklūñ
nashsha jab utregā merā merī ḳhumārī baiThegī