Tags-Duniya

duniyā kī saltanat meñ ḳhudā ke ḳhilāf haiñ
shahr-e-charāġh meñ jo havā ke ḳhilāf haiñ

sab yahīñ chhoḌ ke jaanā hai ḳhabar hai lekin
phir ye ham kis liye duniyā kī havas piite haiñ

ye to nahīñ ki ḳhvāb meñ duniyā badal ga.ī
bedār jab hue to tasavvur nayā milā

ye kis ne pyaar kī nazroñ se dekhā
ki mere dil kī duniyā phir javāñ hai

Dartā huuñ mohabbat meñ mirā naam na hove
duniyā meñ ilāhī koī badnām na hove

ye kyā zid hai ki duniyā bhī rakho aur jī na mailā ho
ye duniyā ḳhush hī tab hotī hai jab dil TuuT jaatā hai

na koī sar ko hai saudā na koī sañg se laag
koī pūchhe to kuchh aisā ġham-e-duniyā bhī nahīñ

tum bhī kahlāte ho dāman-kash-e-duniyā 'bāqar'
sach to ye hai tumheñ jiine kā salīqa bhī nahīñ

use rishte thamā detī hai duniyā
jo do paise kamānā chāhtā hai

mujh ko badnām kar ke duniyā meñ
ḳhud bhī badnām ho rahe ho tum

vo daur aayā sadā zulm-o-sitam ke bhī ḳhilāf uTThī
hamārī aur tirī duniyā ke arbāb-e-hunar jaage

haiñ farāham mujhe be-rāh-ravī ke asbāb
zeb degā mujhe āvāra-e-duniyā honā

rāhat bhī rañj, rañj bhī rāhat ho jab to phir
kyā etibār-e-ḳhvāhish-e-duniyā karūñgā maiñ

ġham-e-duniyā-o-dīñ un ko na fikr-e-nek-o-bad un ko
mohabbat karne vaale be-niyāz-e-besh-o-kam nikle

hai ek shab kī iqāmat sarā-e-duniyā meñ
ye saarā khel mirī jaan ek raat kā hai

duniyā se munsifī kī tavaqqo fuzūl hai
baiThe rahoge hashr-ba-dāmāñ kahā na thā

tham zarā ai adam-ābād ke jaane vaale
rah ke duniyā meñ abhī zād-e-safar paidā kar

terī duniyā mirī duniyā se alag ho shāyad
yaañ to har naqsh miTāne ke liye paanī hai

havā-e-kūcha-e-duniyā maiñ jāntā huuñ tujhe
tū jab bhī aatī hai bīmār karne aatī hai

ham din-bhar duniyā-dārī meñ hañs hañs ke bāteñ karte haiñ
phir saarī raat pighalte haiñ ik ashk raqam karne ke liye