Tags-Duniya

saarī duniyā mirī muḳhālif hai
ek bachcha hai ham-navā merā

jaisā bāhar se ho vaisā hī vo andar se bhī ho
kaash is duniyā meñ aisā aadmī mujh ko mile

duniyā ne jise rif.at-e-fārāñ se sunā thā
hai amn kā zāmin vahī paiġhām abhī tak

miTā.ī jā.egī ye muskurātī nāchtī duniyā
azal se sirf ik din ke liye kyā kyā hai tayyārī

duniyā sarā hai ham haiñ musāfir Thahar ga.e
mulk-e-baqā se aa.e haiñ aazim adam ke haiñ

be-duniyā.ī ne is dil kī aur bhī duniyā-dār kiyā
dil par aisī TuuTī duniyā tark zarā duniyā kī thī

hai ye qissa kitnā achchhā par maiñ achchhā samjhūñ to
ek thā koī jis ne yak-dam ye duniyā paidā kī thī

haqīqatoñ se hai duniyā ko ehtirāz bahut
ki hai mizāj-e-zamāna fasāna-sāz bahut

bāġh-o-bustāñ hue vīrān ki jī jāntā hai
sar-e-duniyā hai vo tūfān ki jī jāntā hai

chhilkoñ ke haiñ ambār magar maġhz nadārat
duniyā meñ musalmāñ to haiñ islām nahīñ hai

apne gird-o-pesh kā bhī kuchh patā rakh
dil kī duniyā to magar sab se judā rakh

bajā ye farmāyā koī tujh sā gadā mubarram nahīñ jahāñ meñ
huzūr maiñ ne bhī saarī duniyā meñ aap sā mehrbāñ na dekhā

ai ġhanī de sīm-o-zar vaqt-e-balā
māl-e-duniyā jaan kī ḳhairāt hai

bhāgo bhāgo duniyā ke pīchhe bhāgo
mujh ko mujh meñ rahne kī bīmārī hai

na duniyā na uqbā kahāñ jā.iye
kahīñ ahl-e-dil kā Thikānā bhī hai

ik yahī duniyā badaltī hai 'faroġh'
kaisī kaisī ajnabī duniyāoñ meñ

sūrat-e-mauja-e-havā 'jālib'
saarī duniyā kī ḳhaak uḌā.eñge

duā hai merī ai dil tujh se duniyā kuuch kar jaa.e
aur aisī kuchh bane tujh par ki armānoñ se Dar jaa.e

maiñ chāhtā huuñ ki duniyā meñ kuchh baḌā kar jā.ūñ
mirā zamāna magar ḳhair-o-shar kī had tak hai

mire paḌos ke ūñche chaubāroñ vaale log
mujhe batāte haiñ duniyā nazar kī had tak hai